Alonso enkawl Leverkusen dihmun a ṭha

Europa League semifinal first leg-ah Xabi Alonso enkawl Bayer Leverkusen-in Rome-ah mualneitu AS Roma 2-0 in an hneh a, Florian Wirtz leh Robert Andrich ten goal an khung.

Inkhel dangah Marseille leh Atalanta te 1-1 in an inhnehtawk. Second leg hi May 9, Ningani zanah khelh a ni dawn a, Atalanta mualah Marseille an lenglut thung ang.

Wirtz leh Andrich

Stadio Olimpico-ah Daniele De Rossi hote aiin Leverkusen-in chance ṭha an nei hmasa zawk. Granit Xhaka-a'n a hun ṭha a hmang ṭangkai thei lo a, Roma striker Romelu Lukaku pawh a vannei bik lo - crossbar a tauh per.

Minute 28-naah Roma right back Rick Karsdorp a chesual a, awlsam taka goalkeeper pek let a tum chu a pet pial avangin Alex Grimaldo tan lakluh a nawm tawk chiah. Spanish left back Grimaldo hian Wirtz atan pein German midfielder hian awlsam takin goal kilah a pet lut.

Wirtz hian goal dang khulh belhna pawh a nei a, keeper Mile Svilar-a'n a dansak. Svilar hian Robert Andrich ball pet kawh zet pawh a dansak bawk. Second half-ah Roma insiamrem hretin chance pawh insiam mah se goal hmaah an vannei tawk lo. Bryan Cristante ball tauh chu goal pawnah chiah a kal.

Leverkusen midfielder Andrich erawhin minute 73-naah box pawn aṭangin nalh zetin a pet lut a, keeper Svilar-a'n a en liam ringawt. German club-in 2-0 in hma an hruai a, Italian club vanneih zan a ni lo. Substitute Sardar Azmoun leh Tammy Abraham ten goal an keng tel lo a, chance ṭha an hlah ve ve.

Alonso enkawl Leverkusen hian Bundesliga an chawi tawh a, DFB Pokal-ah final an luh tawh bakah Europa League final lut turin an dinhmun a ṭha. Hei chauh hi a ni lo, Leverkusen-in tun season-ah hneh loh an la tawng lo - inelna hrang hrangah match 47 hneh loh an tawng tawh lo.

An inhnehtawk

Stade Velodrome-ah goal a lut hma. Mikhual Atalanta-in minute 11-na lekah Gianluca Scamacca hmangin an goal an khung nghal. Teun Koopmeiners-a'n box pawn chiaha ven loha awm Scamacca a hmu fuh a, West Ham striker hlui hian ṭha zetin a pet goal.

Marseille lamin goal an chhuah hnuah siphurh sut tumin an nawr nghal a, minute 20-naah Chancel Mbemba Mangulu hmangin an chhanglet nghal. Mangulu hian box pawn aṭangnin goal kilah a pet lut.

French club-in Pierre-Emerick Aubameyang hmangin hun ṭha an nei leh a, Arsenal striker hlui hian box pawn aṭangin goal pawnah chiah a pet chhuak.

Team pahnihin chance an inneih chhawk a, Marseille chance a neih ṭha zawk. Ismaila Sarr-a'n siphurh sutah a inngai mah se offside vangin pawm a ni lo. Substitute Azzedine Ounahi pawhin crossbar a pet per a, goal pawnah a chhuak.

Hun tawp hmain team pahnih hian chance dang an hmu leh a, an khung tawh lo ve ve. Liverpool pet chhuaktu Atalanta-in khualmualah Marseille an chelh theih a, French club aiin final lut turin an dinhmun a ṭha zawk.