CYMA Cricket : Quarterfinal-ah team ṭha intum dawn lo

CYMA leh CAM buatsaih 12th Inter Branch Cricket tournament quarterfinal fixtures draw chu nimin tlai khan Vaivakawn Cultural Centre-ah neih a ni.

Quarterfinal-ah hian champion tawh Ramhlun Venglai, Chanmari leh Durtlang te an inhmachhawn dawn lo a, upset a thleng a nih loh chuan semifinal leh final-ah inkhel hmuhnawm zawk a awm thei ang.

Ramhlun Sports Complex-ah quarterfinal hi khelh a ni dawn. May 6, Thawhṭanniah Durtlang leh Ainawn te an inkhel ang a, chawhnu lamah Zotlang leh Chanmari te an inkhel zui ang.

May 7, Thawhlehniah RVL vs Zemabawk bakah Luangmual vs Hunthar te inkhel hmuh tur a awm dawn. Fixtures awm dan aṭanga thlir chuan inelna hnuhnung pathum final-a inhmachhawn RVL leh Durtlang te a vawi li nan final-a inhmachhawn leh thei dinhmunah an ding.