A chung berah Hunthar

Volleyball thiam veng Hunthar chuan Ather Pro Volleyball League 2024 an khel ṭha thei hle a, match vawi hnih an khelh tawhah chak ve vein table chung berah an awm.

Ningani zan LPS Arena, Falkland-a inkhelah Hunthar hian Chhinga Veng Spikers chu 25-21, 25-20, 25-20 in an hneh. Thutak Nunpuitu Team lakah set hloh loin an chak tawh bawk a, match hnih aṭangin set an la hloh miah lo tihna a ni.

Vawi khat aia tam champion thei awm chhun Huntharin nikumah a ṭum thum nan trophy la thei turin hun ṭha an nei a, final-ah set hnih set khata hma an hruai hnuah Thutak Nunpuitu Team-in an pawtthla - kuminah champion tumin kawng dik an zawh mek.

Chhinga Veng hmaah Anurag Rawat a che ṭha takzet - Tuipuiral spiker hlui hian ṭum 26 hlap tlain vawi sarih a tisual a, Kuriz Player of the Match ni zawn hmasa ber a ni. Fabian Lallunghnema-a'n point thum chiah hlohin 14 a thawk chhuak bawk a ni.

An khelh hmasak vawi pahnihah Spikers-in champion rinkai pahnih an hmachhawn a, an tan thil a awlsam lo. Tuichangral lakah set la lo a an tlawm hnuah Hunthar hmaah Yougank Baliyan a mal ṭan viau a, ṭum 20 hlap thlain point kua a paih a, set a lakpui zo lo.

Lalneihpuia Hrahsel leh Lalnunpuia chuan point ruk hmuin ṭum li an tisual ve ve a, Chhinga Veng Mizo player zinga thawh hlawk ve ve an ni.

Set khatnaah Anurag a filawr a, ball a hmuh vaw tla deuh vekin point 15 a hmu a, tum hnih a hloh. 13-8-a Hunthar an san hnuah Spikers-in an hnaih chilh zo lo tluan a, Lalchungnunga'n a hlap tlak rualin 23-21-in an inkar tizim mah se Fabian-a'n a chhang let a, Chhinga Vengin point hloh zuiin set an hloh.

Set hnihna tir lamah Spikers tan Yougank rin tlak viau mah se Huntharin a vuak an dansak rualin 13-9-in hma an hruai a, hawi kir lo in 23-20-a nih hnuah Anurag leh Fabian-a'n an hlap tla zawn a ni.

Set khat tal lak tumin Chhinga Vengin player an siksawi nasa a, set thumnaah 14-14 thlengin an inum tawk hle. Ball vuak tlak leh lehlam hlap lo lak leh dan kawngah Hunthar an chungnung a, set hnihna ang bawkin 23-20 a nih hnuah Anurag leh Fabian-a'n an vaw tla zawn leh a ni.