Sunrisers-in run khatin Rajasthan an hneh

IPL-ah result danglam a thleng chho zel a, pakhatna dinhmun luahtu Rajasthan Royals pawh an chak reng thei bik lo. Ningani zan khan Rajiv Gandhi International Stadium, Hyderabad-ah mualneitu Sunrisers Hyderabad-in Royals chu run khatin an hneh.

Sunrisers hian bat hmasak an thlang a; Travis Head (76), Nitish Kumar Reddy (76*) leh Heinrich Klaasen (42*) te chet ṭhat zarah over 20 chhungin 201/3 runs an vaw chhuak. Chutihrualin tun season-a result awm tawh dan thlirin Sunrisers hi chak chiang an la ni lo.

Royals bat hun a thleng a, Jos Buttler leh Sanju Samson te run khat pawh siam loin pavilion lamah an kir. Mahse, opener Yashasvi Jaiswal (67) leh Riyan Parag (77) te zarah chak beiseina an nei ve zel.

Over hnih a la awmin 20 runs siam a la ngai a, thil theih tak a ni. Mahse, Pat Cummins-a'n run sarih chiah a pek bakah wicket a la bawk a, over tawp berah 13 runs siam a ngai.

Bhuvneshwar Kumar-a'n over tawp ber a vawm a, ball ngaah run 11 a pe. Rovman Powell-a'n ball tawp ber a hmachhawn a, chak turin run hnih siam a ngai a, draw turin run khat siam a ngai thung. Mahse, Indian pace bowler ṭha Bhuvneshwar-a'n Powell hi a vawm hlum a, Sunrisers run khatin an chak.

Zanin dar 7:30-ah Royal Challengers Bengaluru leh Gujarat Titans te an inkhel ang a; May 5, Pathianniah inkhel pahnih a awm dawn. Tlai dar 3:30-ah Punjab Kings leh Chennai Super Kings an inkhel ang a, zan dar 7:30-ah Lucknow Super Giants leh Kolkata Knight Riders te an inkhel ang.