Match thum chawl tur Neymar

Paris Saint-Germain forward Neymar chu a malpui hliam vangin a chawlh rih a ngai dawn a, match an khelh hmabak pathumah a inlan thei lo ang - an ram Brazil tan pawhWorld Cup qualifying a khel thei lo hial mai thei.

Nilaini zan khan PSG hian Champions League-ah Istanbul Basaksehir an hneh, chawlh lawk hman hmain Neymar hi hliam vanga lak chhuah a ngai. A hliam hi endik a nih hnuah a chawlh a ngai dawn tih hi a chiang.

Neymar hi zanina PSG-in Nantes an mikhual hunah a inlan thei dawn lo, karleha RB Leipzig nen Champions League group match pawimawh an khelh tur leh Ligue 1 lama Rennes an hmachhawn hunah a inlan thei lo bawk ang. 

Neymar hliam hi PSG tan channa lian tak a ni dawn, ani hma hian Marco Verratti, Mauro Icardi, Leandro Parades, Julian Draxler leh Juan Bernat te chu hliam vangin an chhawr thei lo mek - coach Thomas Tuchel tan buaina tham a tling ang.

PSG chuan thuchhuah siamin, "A hliam chu uluk taka endik a ni a, karleh lamah pawh a la inkhel thei lo ang. A chawlh chen tur la chiang lo mah se Brazil tan pawh a inlan thei lo mai thei," an ti.

World champion vawi nga ni tawh Brazil hian November thla chawhma lam hian Venezuela leh Uruguay chu World Cup qualifying-ah an hmachhawn dawn, forward Neymar a inlan thei lo a nih chuan coach Tite tan channa lian tak a ni ang.