Sawi nin theih loh Apuia

Indian Super League final boruak sanga man of the match chu tu dang ni loin, Mizo tlangval Lalengmawia Ralte (Apuia) a ni - 'Vaivakawn rawlthar' tia kan sawi ṭhin kha tunah chuan player puitling lehzual a lo ni ta a, ISL final-ah meuh player khel ṭha bera thlan a ni.

India tana vawi 18 inlan tawh Apuia hi final-ah khan midfield-a roreltu a ni a, Bagan goal nawr tur tam tak dang chat a, Mumbai goal nawr kawnga puitu ṭangkai a ni - 'The Mizo Tank' tih hial khawpa mawiin Apuia a ding nghet.

Apuia hian minute 90 khelmualah hun hmang tluanin, vawi 57 ball a tawk a, vawi 45 pass dik neiin, vawi 11 zet chu an khingpuite ball ken lai a chhuhsak a, vawi riat zet goal nawrin penalty box-ah ball a luhpui bawk - tlarhnung leh a hmaah a ṭangkai kawp ve ve tihna a ni.

NorthEast United aṭanga hming chhertu Apuia hian tun season ISL-ah match 22 khelin, goal khat a khung bakah, assist vawi hnih a nei a, a ball pek chhuahah 85% zet a pass dik a, vawi 845 pass dikin, match tina vawi 45 zel pass nei ang a ni - khingpui player nen ball an inchuhin vawi 97 a hlawhtling zawkah a ṭang bawk.