Pathian ropui ber rawh se - Lianzuala

Indian football-ah, "Tu nge Lallianzuala?" tia inzawh a ngai tawh lo - mipui tluklehdingawn tel awmna ramah hian Lallianzuala hi a mikhual tawh lo a, Indian football fan-ten an club tana khel tura an duh rawn a ni.

Mahse, Lianzuala hian ram tan nomawi pali a chawi tawh laiin season hmasaah ISL league winner's shield a la tih loh chu club tan nomawi a la chawi ngai lo - Pathianni zan khan a mangchhia chu a thlah a, ISL nomawi chawi chungin champion a lawm ve ta.

Lianzuala chuan, "Rei tak ka nghah chu Pathian zarah ka nei ve ta a, a ropui khawp mai. A dan a dang zar ni ber hian ka hria a, Pathian ropui ber rawh se," tiin Vanglaini a hrilh a, a lawm lai ber pawhin Pathian a theihnghilh lo.

Lunglei tlangval chuan inkhel thlirletin, "A tir aṭanga a tawp thlengin inkhel kan thunun a, kan bul ṭan dan ngaihtuah chuan goal kan chhuah kha chu thinrim thlak tak a ni. Mahse, chak loh inrinna kha keimahah a awm lo a, kan chak kha ka ring nghet tlat tawp mai a ni.

"Si phur zawk ni mah ila, kan tawlh hnung mai lo a, kan nawr chhuanzawm zel a, kan game kan thlak duh lo a, a tawpah chuan kan khung ta nge nge a ni," a ti a, an beidawn duh loh rah an seng thu a sawi.

Lza chuan sawi zawmin, "Heng zawng zawng hi Pathian malsawmna leh awmpuina vang a ni tih chiang takin ka hria a, chuvangin Pathian ropui ber se ka ti. Ka chhungte leh ṭhiante min support-na leh hmun hrang hranga min ṭawngṭaipuitute ṭawngṭaipuina rah a ni," a ti a, lawmthu a sawi bang lo.

Season hmasaa Golden Ball dawngtu Lza hi tun season-ah pawh a che ṭha hle. Match 25-ah goal 10 khungin assist vawi ruk a nei a, Indian player zingah ISL-a goal 10 aia tam season hniha khung thei hmasa ber a ni a, ISL hrim hrimah match 144 khel tawhin, goal 40 a khung a, assist vawi 18 a nei bawk.