Petratos aia ṭha an awm lo

Indian Super League-a a season hnihnaah Dimitri Petratos chu player of the league atan thlan a ni a, Australian striker hi Mohun Bagan-in league winners' shield an dawn theihna tur leh final an luh theihna turin a thawhhlawk hle.

Petratos hian tun season-ah league match 23 khelin goal 10 a khung a, assist vawi sarih a nei bawk. Goal khung piah lamah khelmualah a team tan a ṭangkai tel ṭhin a, hei vang hian Golden Ball chu a kutah hlan a ni.

Australia tana vawi thum inlan tawh striker hian Australian football-a division hniam lamah te pawh hun lo hmang tawh ṭhinin, A League club Sydney FC, Brisbane Roar, Newcastle Jets leh Western Sydney Wanderers tan a khel tawh bawk a, Malaysia Super League club Kelantan, K League 1 club Ulsan Hyundai leh Saudi Pro League club Al-Wehda-ah te tawnhriat a nei bawk.

Tun season-ah Bagan tan inelna hrang hrangah match 35 khelin goal 15 a khung a, assist vawi 11 a nei. Season hmasa khan ISL nomawi a lo chawi tawh a, Durand Cup-ah a champion a, A League-ah Brisbane Roar tan a lo champion tawh bawk - Bagan-ah hian season khatah nuai 650 bawr vel a hlawh niin an sawi.