La Liga champion chu Real Madrid

Spanish La Liga-ah league match li khelh tur la awm mah se Real Madrid um pha thei an awm tawh lo a, an champion - Real hian Inrinni zan khan Cadiz chu 3-0 in an hneh a, a hnuah Barcelona-in 4-2 a Girona an ngam loh zui avangin Real hi um phak theih an ni tawh lo a, an champion.

Real hian Santiago Bernabeu-ah tlak hlau Cadiz an mikhual a, zahngaihna an lantir lo. First half-ah goal khung lo mah se, Brahim Diaz, Jude Bellingham leh Joselu te chuan second half-ah goal khat ṭheuh an khung a, 3-0 in an chak.

Carlo Ancelotti leh a naute chak thu hre sain khualmualah Barcelona an lenglut a, 4-2 in Girona lakah an tlawm. Barcelona hian Andreas Christensen leh Robert Lewandowski (penalty) hmangin vawi hnih ngawt hma an hruai a, rei erawh a daih lo.

Girona tan Portu chuan goal hnih khungin, Artem Dovbyk leh Miguel Gutierrez ten goal khat ve ve an khung bawk a, Girona an chak daih - table-ah pahnihna an ni zui a, Barcelona erawh pathumnaah an tla thla thung.

Real an chungnung

Santiago Bernabeu-a inkhelah first half chhungin Real Madrid-in goal an khung thei lo a, mahse, second half-ah erawh thawnthu tihdanglamin a awm - minute 51-naah Brahim Diaz chuan mawi zetin goal a khung a, Real an hawikir tawh lo.

Minute 68-naah Jude Bellingham inlar ve lehin, an goal hnihna a khung a, 2-0 a ni. Bellingham hi a tirah bench-ah awmin, khelmuala a luh aṭanga minute thumnaah an goal hnihna hi a khung.

Kum 20 mi Bellingham hian La Liga-ah goal 18 a khung tling ta a, 2007-08 season-a Sergio Aguero (kum 19) hnua, kum 21 hnuai lam player zinga La Liga season khata goal 18 khung tling leh thei hmasa ber a ni - sulhnu thar a hnutchhiah zel.

Hun pek belhah Real tan Joselu chuan goal khat dang a khung ve leh bawk a, Cadiz lakah an chak chiang - Real lawmna belhchhah turin keeper Thibaut Courtois a lo kir leh ta a, thla kua zet hliam vanga a chawlh hnuah bul a ṭan a ni.

Barca an mualpho

Xavi-a'n Barcelona-a a cham tur thu a tihchian hnuah a beisei ang result a nei zui lo. Inrinni zan khan Girona chu khualmualah 4-2 ngawtin an ngam lo - he result avang hian rin aia hmain Real an champion a, Girona-in an club chanchina a vawi khat nan Champions League an khel dawn bawk.

Barcelona-in minute thumna lekah Andreas Christensen hmangin goal hmahruai an khung a, mahse, an hlim authawm pawh a reh fel hmain Artem Dovbyk chuan si phurh a sut nghal - tun season La Liga-a goal 20 a khungna chiah niin, top scorer a ni mek.

Mahse, Catalan club an vannei a, first half hun pek belhah penalty hmuin, Robert Lewandowski chuan hei hi goal-ah a chantir. Chawlhlawk hman zui a ni a, 2-1 a nih avangin Barca fan-te ngaihngam takin an awm.

Second half-ah beisei loh thil a thleng zui. Mualneitu Girona tan Portu chuan goal hnih a khung a, Miguel Gutiérrez chuan khung ve leh bawkin, Girona an chak daih.

Atletico beiseina

Real an champion a, Girona-in Champions League an khel dawn bawk - Champions League hmun ruak pahnih a la awm a, mahse, thil mak tawp khawk a thleng a nih loh chuan Barcelona pawhin an khelh ngei a rinawm a, hmun ruak pakhat chauh a awm tihin a sawi theih.

He hmun ruak pakhat hi Athletic Bilbao leh Atletico Madrid-ten an la inchuh a, kartawp inkhelah an chak ve ve. Bilbao hian an mikhualna ramah Getafe chu 2-0 in an hneh a, Inaki Williams chuan goal hnih a khung.

Bilbao chak thu hre sain Atletico hi Inrinni zan khan an inlan ve leh a, khualmualah Real Mallorca chu 1-0 in an hneh - Rodrigo Riquelme chuan inkhela goal awmchhun a khung a, Atletico chak nan a tawk.

Atletico leh Bilbao hian league match li ve ve khelh tur an la nei a, an inkarah point ruk a awm - Diego Simeone naute tan match li aṭanga point sarih hmuh belh a tawk a, Bilbao tan chak vek bakah Atletico chetsual chan tel a ngai thung.