Rawlthar basketball thiam ber Tuikual South

LE Rangva Mizoram Inter-Veng Under 21 Basketball Tournament khelh zawh a ni a, player a nih laia hriat hlawh F. Zodinthara enkawl Tuikual South an champion a, tun dinhmunah Mizorama rawlthar basketball thiam ber an ni.

Inrinni zan Hawla Indoor Stadium, Republic Vengthlanga inkhelah Tuikual South hian an khingpui Nursery Veng chu 89-84 in an hneh a, a vawi khat nan nomawi an chawi a, inelna neih laia team hmuhnawm an nihna chu a tawpah nomawi nen a khar.

Tuikual South manager Dina chuan, "Inelna a awm dawn tih kan hriat tirh aṭangin kan inbuatsaih nasa em em a, basketball court chhung mai bakah taksa tichak thei turin pawn lamah kan inbuatsaih nasa hle bawk.

"Tuna kan hlawhtlinna hi a nihna takah chuan kan thawhrim vang a ni. Player leh coaching staff ten kan tih tur ang ṭha takin kan hlenchhuak a, nakin zela hmabak nei êng tak tak kan nei te kha a lawmawm," tiin Vanglaini a hrilh.

Kum 21 hnuai lam basketball inelna hi ṭum thum an neihna a ni, a hmasa ber atan kum 2022 khan neih niin Mission Veng an champion a, season hmasa khan Khatla South an chungnung ber thung, kuminah Tuikual South hun a thleng - champion nawn thei an la awm lo tihna a ni.

Tualchhung basketball-in hma a sawn a, tun ṭumah hian team 65 an inlan. Aizawl khawpui pawn aṭangin - Siaha, Serchhip, Kolasib, Keifang leh Champhai an inlan thei a, a tir aṭanga a tawp thlengin ngaihhlut a hlawh hle.