India squad-ah Rinzuala ko

Aizawl FC tana season duhawm tak hmangtu Lalrinzuala'n I League-a a chet ṭhat rah a seng a, India probable squad zawm tura koh a ni - Rinzuala bakah hian East Bengal defender Lalchungnunga, Inter Kashi midfielder Edmund Lalrindika, Odisha forward Isak Vanlalruatfela leh Mohammedan SC striker David Lalhlansanga te chu squad-ah hian koh tel an ni.

ISL final khelh vangin Mohun Bagan leh Mumbai City player-te hming tarlan a la ni ve lo a, India tana regular taka inlan phak Lallianzuala Chhangte leh Lalengmawia Ralte (Apuia) te an la awm avangin probable squad-ah hian Mizo pasarih an awm dawn tihna a ni - Indian football-ah Mizo hming a mawi zel.

Blue Tigers hian FIFA World Cup 2026 Preliminary Joint Qualification second round match chu June international break-ah an khel dawn a, June 6-ah Kuwait an mikhual ang a, June 11-ah Qatar an lenchilh leh bawk ang.

India hi an group-ah pahnihna an ni mek a, match li aṭangin point li an hmu - group tina a sang pahnih chuan third round an lut dawn a, Igor Stimac-a enkawl team tean third round lut turin an elpui Kuwait hneh a pawimawh lehzual dawn.

India probable squad-te hian May 10, Zirtawpni aṭangin Bhubaneswar-ah camp an nei dawn a, player hi la chhawk leh tur a nih dawn avangin Mizo player-te final squad-a hmun chang turin an thawhrim a ṭul dawn.

India probable squad

Goalkeepers: Amrinder Singh, Gurpreet Singh Sandhu.

Defenders: Amey Ganesh Ranawade, Jay Gupta, Lalchungnunga, Muhammad Hammad, Narender, Nikhil Poojary, Roshan Singh Naorem.

Midfielders: Brandon Fernandes, Edmund Lalrindika, Imran Khan, Isak Vanlalruatfela, Jeakson Singh Thounaojam, Mahesh Singh Naorem, Mohammad Yasir, Nandhakumar Sekar, Rahul Kannoly Praveen, Suresh Singh Wangjam, Vibin Mohanan.

Forwards: David Lalhlansanga, Jithin Madathil Subran, Lalrinzuala, Parthib Sundar Gogoi, Rahim Ali, Sunil Chhetri.