MPL khel tur zawnna; A tir aṭangin a pawimawh nghal

Mizoram chhunga football inelna sang ber Mizoram Premier League khel tur zawnna MPL11 Qualifier chu vawiin hian RG Stadium-ah khelh ṭan a ni dawn. Team pali FC Bethlehem, Bethlehem Vengthlang, SYS leh MLS FC te an tel a, vawi khat ṭheuh inkhelh kual hnuah a sang berin MPL an khel ang.

Chawhma dar 11:00-ah Bethlehem Derby a awm nghal dawn a, FC Bethlehem leh Bethlehem Vengthlang te an inkhel dawn. MPL qualifier pual hian MPL10 khel lo player a lak theih avangin First Division-a an inkhelh ṭum nen a danglam tawh khawp ang.

Chawhnu dar 1:30-ah MFA Cup champion Lawngtlai club MLS FC te an inkhel dawn a, an khingpui tur hi coach Lalmuankima enkawl SYS FC te an ni. MFA Cup champion vangin Vanlalpeka kaihhruai Lawngtlai club hian inrintawkna nasa tak an nei ang.

Chutihrualin SYS FC hi football zira hun rei tak awm khawm tawh an ni tih hriat a ṭha a, Lungleia innghat an nih bawk avangin Lawngtlai club laka hnehna chan ngei an tum dawn a ni.