Liverpool mualah tawhkhirh Hammers

Zanin dar 11:00 hian Premier League match-ah Liverpool chuan West Ham an mikhual dawn a, fixture chhuahtirh nen kha chuan team pahnih hi khaikhin a rem tawh lo. 

Reds hi season hmang chhia tia sawi tur ni lo mah se season hmasa ang kha chuan an la khel lo tih a chiang a, hliamin a tih buai bawk avangin an dinhmun a ṭha lo hle. 

Hammers erawh duhawm lo taka season bul an ṭan hnuah an insiamṭha chho mek a, league match hmasa pahniha Newcastle United leh Arsenal ngam lotu team hi an league match hnuhnung parukah an tlawm tawh lo. 

Anfield-a inkhel tur ni mah se Covid-19 hmaa entu awm angin fans a punkhawm theih tawh lo a, khualmuala Liverpool tlawh hautakna pakhat chu thai bo a nih avangin Hammers hi a inthlahrun ring suh. 

Liverpool-in season tluan deuh thawin Virgil van Dijk an chhawr thei dawn lo a, Dutch defender hmun ruak hnawh khah a harsat dawn tehlul nen centre back dang pawh hliamin a tibuai. 

Champions League-a FC Midtjylland 2-0 a an hneh ṭumin VVD hmun ruaka awm Fabinho chu hliam vanga lakchhuah a ngai a, centre back pangngai Joel Matip chu hliam vangin a la chawl bawk. 

Fabinho hi a tirah chuan thla ruk vel tal chawl tura ngaih a ni phawt a, mahse khawthlang media-te chuan November international break zawha a lo kir theih tur thu an sawi - zaninah an chhawr thei dawn lo phawt tihna a ni. 

He thu buatsaih lai hian Matip dinhmun sawichian a la awm lo a, mahse media lama Reds training lai thlalak phochhuahah chuan Fabinho leh Matip thlalak hmuh tur a awm ve lo. 

Matip-a inlan thei lo a nih chuan kum 23 mi Nat Phillips leh kum 19 mi Rhys Williams chu Klopp-a'n duhthlan tur a neih an ni a, player pahnih hian Premier League match an la khel ngai lo ve ve!

Klopp-a'n tawnhriat nei tlem defender pahnih hi Joe Gomez kianga ding tura a ring lo a nih pawhin a ṭulna hmun apianga khel thei James Milner an kawl tel a, English midfielder hian centre back-ah a rawn khel thut a nih pawhin mak ti suh.

Midfield lamah Thiago Alcantara leh Naby Keita dinhmun a la chiang lo a, midfield erawh Liverpool squad chhahna lai a nih avangin Jurgen Klopp-a tan lu hai lutukna tur niin a lang lo. 

Champions League an khelh zawhah Salah-a'n bai chungin dressing room pan mah se ṭha takin training a zawm thei a, tlarhmaah chuan Sadio Mane leh Roberto Firmino-te nena an inkawp bawk kan hmu leh dawn niin a lang. 

Liverpool chauh hi hliam vanga buai an ni lo a, David Moyes enkawl West Ham tana player pawimawh Michail Antonio chu hliam vangin a inlan thei dawn lo. 

Manchester City nen 1-1 a an inhnehtawk ṭuma lakchhuah ngai Antonio hi khawthlang media-te chuan kar ruk vel tal a chawlh a ngai dawn niin an sawi a, league match ruka goal thum khung thei forward tel loin Hammers an buai ang. 

Hetihrual hian Brentford aṭanga loan hmanga an hawh Said Benrahma chu chhawr theih a ni tawh dawn a, season hmasa Championship-a goal 17 khungtu hi Premier League atan a tlak leh tlak loh a hriat thuai ang. 

Hammers hian Sebastien Haller an la nei bawk tih hriat a ṭha a, kum 26 mi forward hian tun season-ah match riat khelin goal nga a khung tawh a, assist vawi khat a nei. 

Aston Villa laka 7-2 a an mualpho hnuah Liverpool-in Everton 2-2 in an inhnehtawkpui a, referee thutlukna avangin chak phu Reds hi an chak zo lo ti pawhin a sawi theih. 

Everton hnuah Reds hian Ajax (1-0), Sheffield United (2-1) leh Midtjylland (2-0) hmachhawnin an hneh vek a, mahse an khelh dan erawh a hmuhnawm tawk lo. 

West Ham hian an league match hmasa pahniha an tlawm hnuin Premier League team ṭha Wolves chu 4-0 in an sawp a, 3-0 in Leicester City an hneh zui!

Tottenham Hotspur lakah goal thum chhuah hmasa mah se an sut leh vek a, Manchester City chu 1-1 in an inhnehtawkpui zui - fixtures hautak anga langah point an hlawh chhuak zel a, Liverpool pawh an zuam sawt ang.