Arsenal leh Man City chesual duh lo!

Premier League nomawi inchuh boruak a sang a, tunah zet chuan 'a che che sih hlawkah' tih ang mai kha a ni ta. Vawi khat chet sual zeuh chu champion loh theihna a ni tawh - a chung bera awm Arsenal leh Manchester City te an chesual duh rih lo.

Mikel Areta nauten Inrinni tlai khan Bournemouth 3-0 in an hneh a, hma an hruaina chu point liah an tisang. Mahse, zan lamah Man City chuan Erling Haaland-a goal li hmangin Wolves 5-1 in an sawp - an inkar chu point khatah an tihniam leh nghal.

Arsenal hian an hmabakah Manchester United leh Everton an la tum dawn. Pep Guardiola naute hian Fulham, Tottenham Hotspur leh West Ham an la hmabak, an chak vek chuan Gunners result ngaihchan tel ngai miah loin nomawi an humhim ang.

Laipui a puak

Emirates Stadium-a inkhelah a tir aṭangin Arsenal chuan kawng tinrengin inkhel an thunun. Kai Havertz, Bukayo Saka, Declan Rice, Thomas Partey leh Leandro Trossard te chuan an hun ṭha neih uiawm takin an khung lo vek.

Chawlhlawk hma deuhin box chhungah Havertz a tlu, Bournemouth goalkeeper Mark Travers nen an inkara thil thleng hi VAR hmanga ennawn a nih hnuah penalty pek tlang a ni a, a pettu Saka tan buaina tur a awm lo.

Second half tirah Saka hian hun ṭha bik a hlah leh, keeper Travers chauh a hmachhawn tawhah a khung lo - defender Gabriel chuan mawi zetin khungah inngai mah se Havertz a lo offside avangin hnawlsak a ni thung.

Goal khung an harsat karah Trossard a rawn inlar a, ani hian Rice-a ball khen nalh tak chu hnai takah a khung. England international midfielder Rice hian hun tawp dawnah chak nemnghehna a khung ve leh bawk.

Arsenal hi awlsam taka chak erawh an ni bik lo. Dominic Solanke-a'n defender Gabriel a paltlang hnuah hun insiam hman ṭep mah se William Saliba a inrawlh hman a, Justin Kluivert pawhin David Raya tan hna hautak siamsakin, an goal khung chu VAR hmanga hnawl a nih bakah penalty an beisei chu pek an ni lo bawk.

Bournemouth nen an inkhelh hmain Gunners goalkeeper Raya chuan Premier League goalden glove a dawng dawn tih a chiang tawh. Raya hian match 30 aṭangin goal chhuah lohna match 15 a nei ta a, midang tan umphak theih a ni tawh lo.

A hunah Haaland

Arsenal an chak tih hresa chungin Manchester City an inlan a, tawnhriat ngah leh champion dan thiam an ni bawk a, an buai phah lem lo. Erling Haaland-a'n minute 12-na lek aṭangin goal a khung ṭan a, goal thum dang a khung belh bawk.

Haaland goal khung karlakah Wolves tan Hwang Hee-chan chuan goal khat lo thawh ve mah se awmzia a nei phak lo, hun tawp dawn lamah substitute Julian Alvarez chuan Man City chak a nemnghet a, nuamsa takin point thum an hlawh.

Man City manager Guardiola chuan, "Arsenal khelh dan kan hria, an ngelnghetin an chesual duh lo hle. Goal difference an nei ṭha bawk si a, chuvangin kan tan point hloh a rem lo hrim hrim tihna a ni a, inhnehtawk a tih chi tawh loh a ni.

"Kan hmabak pahnih hi khualmualah kan khel dawn a, tah chuan chak ve ve theih ka beisei a, a tawpna keimahni khelmualah pawh kan chak ngei kan beisei," a ti a, nomawi inchuh boruak sang viau mah se chiai miah loa an khelh theih a inring.

Goal li khungtu Haaland chungchang sawi zuiin Pep chuan, "Kan khingpuite hian an veng bik ṭhin a, chuvangin a tan thil a awlsam vek lo. Chutiang karah chuan tun season chhungin league goal 25 a khung leh der tawh a, hna a thawk ṭha hle a ni.

"Sawiselna te han dawng ve bawk ṭhin mah se a goal khung zat aṭangin a tichhe lo tih a chiang a, a khelh danaha amah leh keini pawh kan lawm," a ti. Hun pawimawh lai taka Haaland rawn che ṭha leh ta chuan a thla a timuang hle.