MCL atan player an lakhawm

Tualchhung cricket inelna ngaihhlut Mapuia Memorial Mizoram Cricket Leaque (MCL) a hnai a, tun thla May 12 aṭangin Suaka Cricket Stadium, Sihhmuiah khelh a ni ang, inelna hmachhawn turin club ten player an lakhawm.

MCL vawi 12-na atan hian May 3, Zirtawpni zan khan Aijal Club-ah player lilam a ni a, player lei theiha chhawpchhuah 40 zingah player 20 lei an ni.

Player lei zingah hian Zemabawk Pitchers player nilai Vanlalpekhlua, Zemabawk chu player man to ber niin Chanmarians-in Rs 37,000 in an lei a ni. Player man to pahnihna chu Venghnuai Raider player K. Lalṭhazuala, Maubawk Veng niin Rs 30,000 a lei a ni.

Player lilam bakah hian MCL atana hmun ruak pahnih leitu Zarkawt Lords leh Chhinga Veng ten player lilam hi an duhzawng based price in an thlang thei a, Zarkawt Lords te'n thlang hmasain - F. Vanlalmuanzuala, Bawngkawn South leh Lalhmangaiha, Luangmual te an thlang. Chhinga Veng ten G. Lalbiakvela, Luangmual leh Marcus Lalpekhlua, Pacers te based price in an la bawk.

MCL khel tur hian 1st division screening tournament neih zawha a sang pali - Chanmarians, Kulikawn, Ramhlun Venglai leh Ṭhuampui Chinari te an tling sa a.

Hmunruak dang pahnih hi CAM club, district leh recognised club ni lo te tan pawha lei theih niin Zarkawt Lords leh Chhinga Veng ten chuhtu awm loin Rs 1,50,000 ve ve in an lei a ni.