A vawi hnih nan TNT an chak

Ather Pro Volleyball League 2024 an match hmasa berah Thutak Nunpuitu Team an chak lo a, a hnuah erawh an insiamṭha. Inrinni zan khan Durtlang North chu 25-20, 24-26, 25-17, 25-17 (3-1) in an hneh a, an match hnuhnung pahnihah an chak ve ve a ni.

LPS Arena, Falkland Venga inkhelah TNT tan an thiampuipa Vanlalṭanchhana a hmuhnawm leh tawh hle. Valbuanga hian point 20 a thawk chhuak a, ani bakah hian Zosangzuala (12 points) leh Laldinchhunga (11) ten an thlawp ṭha bawk.

TNT hian match hnih aṭanga point nga hmuin table-ah pahnihna an ni a, an chungah hian an hneh loh Hunthar an awm. May 9, Ningani zanah champion lai TNT hian chak la nei lo Chhinga Veng Spikers an hmachhawn leh ang.

Zirtawpni zan khan hmeichhe inelna neih niin Bungkawn chuan Diakkawn lakah 8-15, 15-13, 15-12 15-8, 15-6 (4-1) in hnehna an chang. Bungkawnin set li lain point li an hmu a, Diakkawnin set khat lain point khat an hmu thung a ni.

Pro Volleyball League hi LPS chuan TV-ah live in a pe chhuak ṭhin. TV bakah hian YouTube kaltlangin en theih a ni a, Rs 119 chawi a ngai ve thung.