Gaza indona chungchangah Israel tel loin inbiakna nei

Qatar, Egypt leh United States kaihhruaia Gaza chungchanga inbiakna neih mek chu Inrinni khan Egypt-ah chhunzawm leh niin Hamas palaite nen inbiakna neih a ni. Hemi ṭum hian Israel aṭangin palai an kal lo.

He inbiaknaah hian ni 40 chhung inkahhai puan leh Palestinian mi tang inthleng chungchanga Hamas ngaihdan an lak thu Britian chuan a tarlang. Israel erawh chuan palai an la tir ve lo a, inkahhai thuthlung an duh dana siam rem phawt an ngiat nia tarlan a ni.

Israel leh Hamas hi inbiakna neih hmasak zawkah an inrem thei lo a, Hamas lamin tiam chin awm loa inkahhai puan an duh laiin Israel lam hian raltlan tam tak awmna Rafah beih a la tum em avangin inremna hi an nei thei lo a ni. Gaza indona hian thla sarih dawn a awh tawh a, Gaza mipui 34,654 chuang an thi tawh a ni. United Nations chuan Gaza indona avang hian chenna in 70% chuang chu tihchhiat a nih tawh thu an tarlang.

Australia-ah Palestinian leh Israel thlawptute inaû buai

US college hrang hrangah Gaza indona chungchangah nawrh huaihawta buaina chhuak chu khawvel ram dang zirna inah pawh a darh ve zel a, Australia-a Sydney university-ah Zirtawpni khan Israel thlawptute leh Palestinian thlawptute inkarah buaina a chhuak.

Palestinian thlawpna lantirtute leh Israel lam ṭangte hi inaû buaiin flag-te an invai khum a, buaina nasa zawk erawh a thleng lo nia tarlan a ni. Palestinian thlawptute hi University of Sydney pawnah ni 10 chhung an inkulh tawh a, Palestine flag zarin, an thlawpna thuziakte an keng lang a ni. Zirlaite chuan US zirna inte hmalak dan chuan a tihphur thu an sawi a, Sydney University chu Israel zirna inte nena inzawmna an neih titawp turin an phut a ni.

Zirtawpni khan Israel thlawptu mi 100 chuangte chu Palestinian thlawptute inkulhna hmunah kalin an inhmachhawn a, buaina nasa zawk a chhuah loh nan venghimtute tirh luh nghal an ni. Israel ṭantute leh Palestinian thlawptute hi an inauh el bakah flag an invai khum tih mai loh chu buaina lian tham a chhuak loa ni.