Champions League semifinal : Paris mualah Borussia Dortmund an lut dawn
Zanin dar 12:30 hian Paris Saint Germain chuan Borussia Dortmund an lo mikhual dawn. Champions League final lut tur zawk chinfelna inkhel a ni dawn a, a tir aṭangin a hmuhnawm nghal dawn tih a chiang.
German rama semifinal first leg an khelh ṭum khan, mualneitu Dortmund kha Niclas Fullkrug-a goal khat hmangin an chak - Bundesliga club tan final lut turin goal chhuah loh a tawk; PSG tan erawh goal khung ngei ngei a ngai tihna a ni.
Final luh tum PSG
France rama nomawi chawi theih hrang hrang an chawi tam tawh a, club thuneitu lamin an duh ber chu Champions League nomawi a ni. Paris Saint Germain forward Kylian Mbappe chuan an goal phurh suta final an lut ngei a beisei.
Mbappe chuan, "Tun hma lama kan sulhnu leh chet tawh dan thlir chuan kan lakah hian boruak rit tak a awm, mahse chutiang hmachhawn thei tur chuan kan puitling tawh a, tawnhriat kan nei tam tawk tawh bawk.
"Inkhel result thlak danglamin final kan luh theih ngei ka beisei," a ti. Signal Iduna Park-ah Mbappe hi goal hmaah a vannei tawk lo, remchang erawh a insiam nual thei thung - zaninah vanneih theih tawh a inring hle.
PSG coach Luis Enrique pawhin beisei an neih thu sawiin, "Inkhel hmasa zawka kan danglamna kha goal khat chauh a ni a, result khan team pahnih inthlauh loh zia chiang takin a ti lang, minute 90 dang inkhel turin kan inpeih," a ti.
Ligue 1 champion hian Dortmund nen an intawn inkarah match dang an khel miah lo. Enrique naute hi UCL khel turin an inbuatsaih ngar ngar a, hahchawlhna hun an ngah bakah player hrem leh hliam langsar awm loin an khel thei dawn, beisei an nei sang hi a mak lo.
Dinhmun ṭha
Champions League-ah hian 'away goal rule' hman a ni tawh lo, mahni khelmual leh khualmuala goal khung hlut lam a inang reng tawh tihna a ni. Borussia Dortmund tan goal neihsa venhim a tawk a, chutihrualin thil awlsam erawh a ni dawn lo.
Dortmund coach Edin Terzic chuan, "Wembley Stadium pan thei tura kan beih a ngai dawn. Tuna kan tlan theih dan chun second leg bika inhnehtawk a ni, inhnehtawk chauh ni loin Paris-ah pawh chak kan tum ang.
"Kan dinhmun ṭha hret mah se kan inkar a zau lo, chuvangin a tir aṭangin fimkhur em ema kan khelh a ngai dawn," a ti a. Final khelhna tur Wembley Stadium pan theih dan tur an ngaihtuah nasa hle tihna a ni.
Dortmund hian PSG laka goal an venhim kha an vanneih vang tia sawi theih a ni a, chutihrualin goal khat chauh an khung kha a vanduai ve tho bawk. Jadon Sancho awmna team hi Paris club tan zuam ngawt chi an ni lo, an goal nawr a na tawk hle.
Sancho hi jersey eng (yellow) a hak chuan player danglam daih a ni a, mual sir aṭangin ball hlauhawm tak tak a pe chhuak ṭhin. England international hi danglamna siam thei khawpa thiam a ni - PSG hian an ngaihthah thiang lo.
Inlan tura beiseite:
PSG: Gianluigi Donnarumma; Achraf Hakimi, Marquinhos, Lucas Hernandez, Nuno Mendes; Zaire-Emery, Vitinha, Fabian Ruiz; Ousmane Dembele, Kylian Mbappe, Bradley Barcola
Hrem: Awm lo
Dortmund: Gregor Kobel; Julian Ryerson, Mats Hummels, Nico Schlotterbeck, Ian Maatsen; Emre Can, Marcel Sabitzer; Karim Adeyemi, Julian Brandt, Jadon Sancho; Niclas Fullkrug
Hrem: Awm lo