Lza & Apuia chawimawina Football hmanga: Mizo min lungrual tirtu an ni - Sports Minister

India rama football inelna sang ber, Indian Super League-a Mumbai City champion puitu Lallianzuala Chhangte leh Lalengmawia Ralte te chawimawina leh lawmpuina hun chu nimin khan Mizoram sports minister Lalnghinglova Hmar chuan a office chamber-ah a buatsaih a, Mizo footballer ṭha pahnih avanga Mizo an inlungrual ṭhin thu a sawi.

Tetea Hmar chuan, "Sakhuana, kohhran leh thil dang tam takah ngaihdan a hrang a, inlungrual a harsa hle. Mahse, Mizoten Maharashtra khawpui club Mumbai City daih erawh kan ṭan tlang a, kan inlungrual tlat - a chhan chu Mizo tlangval an tel vang a ni a, Apuia, Lianzuala leh Hmingthanmawia (Valpuia) te hian football hmangin min inlungrual tir a ni," a ti a, Mizo tlangval pathum a fak.

ISL khelh zawh takah Mumbai City chuan final-ah 3-1 in Mohun Bagan an hneh a, Mumbai-ah hian Lallianzuala Chhangte, Lalengmawia Ralte leh Hmingthanmawia Ralte (Valpuia) te an khel - Lza leh Apuia hi chawlh hmangin an lo haw a, Valpuia erawh a lo haw ve hman loh avangin a tel ve lo.

Chawimawi tlak

Tetea Hmar chuan, "Lza leh Apuia zinkawng hi sawi dawn ila, sawi tur tam tak a awm. An naupan tet, theihtawp an chhuah lai aṭang tawha hretu ka ni a, an thawhrimna leh insumtheihna avangin tun dinhmun hi an thleng tih ka chiang.

"Hetiang taka an hlawhtling chung hian an inngaitlawm em em reng a, an ei châk zawng leh tih châk zawng pawh ti loa insumin, tun dinhmun hi an thleng a, an nunah hian entawn tur tam tak kan nei a ni," a ti a, Mizo ṭhalaite chu anmahni entawn turin a sawm.

Sports Minister chuan, "Professional footballer ni mah se, India tana inlan tur hian kawng thui tak a la awm. Apuia leh Lza erawh regular taka India tana inlan phak an ni," a ti a, Mizo footballer ṭha pahnih hi lawmpuina thilpek a hlan bawk.

Lalpa a ṭha!

Player pahnih lawmpuina hunah hian Lza chuan thu sawiin, "Kan beisei phak bakin min lo lawmpui a, kan lawm takzet. Beisei angin season bul kan ṭan lo a, a nihna takah chuan champion pawh kan beisei ngam lo hman hial.

"Pathian a ṭha em a, a kaihhruaina leh awmpuinain tun hi kan thleng. Kan beidawn rum rum hnuah kan champion a ni. Mite ngaihah hlawhtling anga sawi kan lo ni ve ta reng mai. Mahse, kan nunah entawn tur emaw zir tur emaw an nei a nih chuan Isua neitu ka nihna hi lo entawn se ka duh - hnam dang aia kan danglamna hi Isua neitu kan nihna hi a ni tur a ni," a ti.

Apuia pawhin he hunah hian thu sawiin, "Kan champion vawi khatna a ni a, ka lawm takzet. Min lo lawmpuitu Mizo mipui chungah lawmthu ka sawi a, Mizo nih hi a nuam ka ti ṭhin - Min lo thlawp a, inṭawngṭainaa min lo hre reng turin ka ngen che u a ni," a ti a, Mizo mipui hnenah lawmthu a sawi.

Sulhnu chu

ISL khelh zawh takah khan Lza'n league match 25 khelin goal 10 a khung a, assist vawi ruk a nei bawk - Indian player zinga ISL-a season khat aia tam goal 10 khung tling thei awmchhun a ni a, Mumbai-in nomawi an chawi nan a thawhhlawk hle.

Apuia hian season khelh zawh takah khan Mumbai tan league match 22 khelin, goal khat a khung a, assist vawi hnih a nei. Final-ah player of the match-a thlan hial khawpin a khel ṭha a, an champion nana player pawimawh tling phak a ni.

Sports minister Tetea Hmar chuan, "Mipui heti zat awmna rama ram tana khelh phak a harsa em em. Khawvel huapin football-ah India hi sang lem lo mah ila, tribal quota awm miah loa tlin ngai a ni a, chutiang karah chuan ram tan pawh Apuia leh Lza hi starting XI chang reng thei an ni," a ti a, a fak.