5 Star Chelsea

Chelsea-in David Moyes-a kaihhruai West Ham chu 5-0 in an sawp. Stamford Bridge-a an match hnuhnung pathumah Mauricio Pochettino kaihhruai Blues hi an chak vek a, goal 13 tehmeuh an khung bawk.

Pathianni zan inkhelah hian Blues tan Cole Palmer-a'n bul a ṭan a, Conor Gallagher leh Noni Madueke ten goal khat ve ve an khung hnuah Nicolas Jackson-a'n goal hnih a khung.

Chelsea hian match 35 aṭangin point 54 hmuin table-ah pasarihnaah an awm mek a, nizana Manchester United inkhel result-in an awmna erawh a thlak danglam thei thung.

Premier League aṭangin team paliin Champions League an khel dawn a; Manchester City, Arsenal leh Liverpool ten an khel chiang tawh. Hmun ruak pakhat hi Aston Villa leh Tottenham ten an inchuh mek.

Table-a panganaah hian Europa League an khel dawn a, hmun ruak pakhat erawh FA Cup hmanga zawn tur a ni. Manchester City-in FA Cup final-a Manchester United an hneh chuan league-a paruknain Europa League an khel ang a, pasarihnaain Conference League an khel thung ang.