Liverpool hmaah Spurs beiseina a chuai

Tottenham Hotspur tan season thara Champions League khelh beiseina a chuai - Pathianni zan khan Liverpool chu 4-2 in an ngam lo a, a zawna league match li an tlawm tak avangfin palina Aston Villa chu point sarih ngawtin an phak lo mek.

Spurs inlan hma hian Brighton & Hove Albion chuan 1-0 in Aston Villa an hneh a, Joao Pedro chuan minute 87-naah inkhela goal awmchhun a khung. London club-in chanchin lawmawm hre sa chungin Liverpool an lenchilh a, mahse, minute 60 a tlin hmain goal li an chhuah tawh!

Tottenham hian hnehna chang ngat se, match khata khel tlem zawk ni chungin Villa nena an inkar chu point liin an sawr zim dawn tihna a ni a, mahse, boruak sangah beisei an phak lo. Liverpool tan Mohamed Salah, Andy Robertson, Cody Gakpo leh Harvey Elliot ten goal khat ṭheuh an khung a, 4-0 in hma an hruai hman.

Spurs tan Richarlison leh Son Heung-min ten minute 70 hnu lamah goal khat ve ve khung ve leh mah se, an harhchhuah a tlai hret a, an mikhualna ramah 4-2 in an tlawm a, Champions League pawh lungtilengtu mai a chang chho ṭan.

Salah a dam ta!

Kar hmasa lawka Salah leh Reds manager Jurgen Klopp te an inhmu thiam lo a, inkhelh laia thil thleng a nih avangin ngaihven a hlawh zui hle. Mahse, Spurs an mikhual hmain Klopp-a'n an inkar boruak chinfel a nih tawh thu a sawi a, a thusawi dikna khelmualah lantirin a awm.

Thinlung hliam Salah rilru tihdamin a awm tawh a, minute 16-naah goal hmahruai a khung nghal. Egyptian forward hian Cody Gakpo-a siamsak chu an hmahruaina goal ni turin a tauh lut a, minute 45-naah Robertson-a goal khungna kawngah a inrawlh bawk.

Hei mai a ni lo - minute 59-naah khel ṭha em em mai Elliott chuan Liverpool goal lina a khung a, hei pawh Salah siamsak a ni a, goal ropui bik a ni. Elliott-a goal khung hma chiah hian Gakpo chuan an goal thumna a khung ve bawk.

Kum 31 mi Salah hian tun season inelna hrang hrangah match 42 khelin goal 25 a khung tling ta a, assist vawi 14 a nei bawk - season thara chhuak tur anga sawi Salah-a'n Liverpool tana thlak a har turzia a pholang leh ta.

Cham rih la

Salah hian Premier League record thar a siam nghal bawk - Egytpian forward hian Premier League season thum chhung chu a zawnin goal 10 leh assist 10 a nei ta a, hetiang ang record nei thei hmasa ber a ni.

Chu mai a ni lo - Premier League-a season nga (a zawn kher ni lo) chhung, goal 10 leh assist vawi 10 nei tling thei player pahnihna a ni a, Manchester United legend Wayne Rooney hnung a zui.

Tun hnaiah Klopp nen an inhmuh thiam loh avangin Liverpool fans tam takin Salah hi an dem a, June-a kum 32 tling mai tawh tur forward hian kum khat bak contract a neih tawh loh bawk avangin fans ṭhenkhatin an ui lo a, man to taka ngamtu Saudi Arabia lama kaltir an pawi ti lo.

Mahse, Salah-a'n Liverpool innghahna a la ni reng tih a pholang nawn a, a hmun ruak luah khat zo player an vang ang tih a chiang. Liverpool midfielder hlui Danny Murphy chuan, "Salah hian Liverpool chhuahsan duh se chu, khatiang taka ṭha khan a rawn khel chhuak lo ang. Club tan a theihna zawng zawng a hlan a ni," a ti.

Spurs an zawr

Ange Postecoglou enkawlna hnuaiah Spurs-in bul an ṭan ṭha a, season ṭantir lama an league match hmasa 10-ah tlawm an nei lo - champion an sawi ri a, Manchester City, Arsenal leh Liverpool te kiangah an lengah an inngai.

Mahse, an hnu league match 25-ah vawi 11 an tlawm a, vawi li draw an nei a, vawi 10 chiah an chak! Season ṭantira champion sawi ri team khan season thara Champions League khelh chu an thupui ber a ni tawh a, hei pawh a thleng kher lo mai thei.

Spurs tan minute 72-naah Richarlison chuan goal rawn khung vein a team tan beiseina thar a siamsak a, minute 77-naah Son chuan a belhchhah ve leh bawk. Mahse, London club harhchhuah a tlai a, nuamsain Liverpool an chak.

Hetihlai hian Son erawh a hming a ṭha zel a, Spurs captain hian tun season-ah league goal 17 a khung leh der tawh a, assist vawi kua a nei bawk - Liverpool a hmachhawn hnuhnung pangaah goal a khung vek!