Mizoram U20 team an inpuahchah ngawrh

Swami Vivekananda U-20 Men’s National Football Championship khel turin Mizoram team an inpuahchah mek a, May 8, Nilaini hian Aizawl an chhuahsan dawn. Mizoram hian match hmasa berah Meghalaya nen May 12, Pathianni hian an khel ang. An group-ah hian Meghalaya bakah Rajasthan leh Maharashtra te an awm bawk.

Nimin khan HC Zarzoliana enkawl team hian professional player chawlh hmang mekte leh tualchhung player ṭha inhlawm khawm nen friendly match an khel a, tukin zing hian RG Stadium-ah friendly match hnuhnung an khel leh ang.

Mizoram aiawh tur zingah hian tawnhriat nei ṭha player an awm nual. Goalkeeper-ah Aizawl FC player Joel B. Lalramchhana a awm a, kumin Santosh Trophy final round-a winger pahnih Ainawn Veng tlangval Lalthankima leh Lunglei Zobawk tlangval T. Malsawmzuala te goal nawr turin an awm bawk.

Kum bithliah inelna ni mah se Tlangmawi midfielder Michael Lalbiaksanga leh Muanna Veng forward Lalrothanga te chu MPL-a tawnhriat nei tawh an ni a, Lungdai tlangval Lalngaihsaka chu midfield-a hmun pawimawh chang tura ngaih a ni. Ngaihtea hi season liam ta khan Calcutta Football League first divison club Kalighat Sports Lovers Association-ah Thathana nen an khel a, Kalighat hi Premier Division an kaipui.

Mizoram U20 training hi India team-a koh Lalchungnunga leh Lalrinzuala te pawhin intuai hriamna hun atan an hmang. Durtlang tlangval Chungnunga hi India senior team tan vawi khat a inlan ve tawh a, tun ṭuma final squad-a awm phak hi a pawimawh dawn hle.

Rinzuala hi MPL club aṭanga India probables squad-a koh phak a ni a, Mizoram football tan leh Aizawl FC tan chanchin lawmawm a tling. Serchhip tlangval hi Aizawl FC player nilai India probables-a koh pahnihna a ni a, tun hmain David Lalrinmuana koh a ni tawh bawk.