Vawiin aṭangin Senior Women's Football C'ship

Inter District Senior Womens Football Championship 2023-24 chu vawiin aṭangin Serchhip-ah khelh ṭan a ni dawn. Inelnaah hian MFA hnuaia district 11-te an tel thei vek ang.

Serchhip DFA-in inelna hi an thleng a, Serchhip Sports Complex-ah inelna hi neih a ni ang. Ni hmasa berah hian match li a awm dawn a, group pali aṭangin match khat ṭheuh an khel nghal dawn.

Chawhma dar 9:00-ah Saitual leh Hnahthial te an inkhel ang a, chawhma dar 11:00-ah Lunglei leh Champhai te an inkhel lehnghal ang. Chawhnu dar 1:00-ah Mamit leh Serchhip te an inkhel ang a, a tawp berah Kolasib leh Khawzawl te tlai dar 3:00-ah an inkhel ang.

Group A-ah Saitual, Hnahthial leh Lawngtlai te an awm a, group B-ah Lunglei, Champhai leh Aizawl te an awm. Group C-ah Mamit, Serchhip leh Siaha te awmin group D-ah Kolasib leh Khawzawl te an awm thung.

Group tin aṭangin a sang pahnihin quarterfinal an lut dawn a, group D-ah team hnih chiah an awm avangin Kolasib leh Khawzawl te hi chu knockout stage lut sa niin group pakhatna tur an zawng dawn.

Quarterfinal hi May 11, Inrinniah khelh a ni ang a, Semifinal hi May 13, Thawhṭannia khelh tur niin May 15, Nilainiah final khelh a ni ang.