Dutch champion PSV Eindhoven

PSV Eindhoven chu Dutch Eredivisie champion an ni - league match hnih khelh tur la awm mah se, kartawp inkhelah Sparta Rotterdam chu 4-2 in an hneh a, anmahnih hnaih bertu, Liverpool coach thar tur Arne Slot-a enkawl Feyenoord-in an um phak thei tawh lo.

Peter Bosz-a enkawl PSV hian league nomawi chawi turin draw result bak an mamawh lo a, mahse, Rotterdam hian minute riatnaah Metinho hmanga goal khungin, PSV hi an hlauhthawntir.

Mahse, mualneitu PSV tan Said Bakari (own goal), Johan Bakayoko, Olivier Boscagli leh Jordan Teze ten goal khat ṭheuh khung ve lehin, an chak chiang a, Rotterdam tana Olivier Boscagli (own goal) in awmzia a nei phak lo.

PSV hian season an hmang ṭha rem rem hle - league match 32 an khelh tawhah vawi 28 chakin, vawi khat chiah an tlawm a, league match hmasa 17 chhung chu a zawnin an chak hial!

Hei vang hian PSV hian champion an phu, tiin a sawi theih a, season ruk zet league nomawi an chawi loh hnuah champion nomawi an chawi ve leh ta chiah bawk - club chanchina Dutch top flight league-a vawi 25 an champion-na chiah a ni.

Season hmasa champion Feyenoord chu league-ah pahnihna an ni chiang dawn a, hetihlai hian Dutch club lar ber ang hiala chhal ngam Ajax erawh panganaah an awm mek a, a aia hniama season khar thei dinhmunah an la ding mek bawk.