Madrid Open champion Rublev

Damlohna vangin a buai a, set hmasa berah hnufual hman viau bawk mah se Andrey Rublev chu huaisen takin a tho chhuak, a khingpui Felix Auger-Aliassime chu 4-6, 7-5, 7-5 a hnehin Madrid Open title a la.

Russian tlangval hi khawsik vangin a buai deuh a, mahse inhnukdawk loin final a khelh lui. Set hmasa berah 4-1 in a hniam nghal, world number 8 mi mualpho thei a ni. Amaherawhchu, set hnuhnung pahnihah a vannei zawkah a ṭang.

Masters 1,000 huangah a vawi hnih nan a champion a, inelna hi Grand Slam dawta dah san a nih avangin atan a hlu hle. Rublev chuan, "Tun hnai ni kaw chhunga ka thil tawnte hi a mak pawh ka ti thei hle.

"Harsatna ten min tlakbuak ve a, chutiang chung chuan a tawpah nomawi ka chawi hram. A chang hi chuan vanneihna hi kan chungah a lo thleng ve ṭhin a ni, a nihna tak sawi chuan nomawi ka chawi tawh zinga ka chhuan ber a la ni hial ang," a ti.

Tennis clay court season an hmang mek a, tun kar tawp lam aṭangin Rome khawpuiah Italian Open an khel dawn, tun season atana French Open inbuatsaihna tournament zinga a hnuhnung ber a ni tawh ang.

Clay court inelna lian ber French Open hi May 20 aṭanga June 9 chhungin Paris khawpuiah khelh a ni dawn. Harsatna lian tham a thleng a nih thut loh chuan vawi 14 champion tawh Rafael Nadal pawh inlan leh thei tawh tura beisei a ni.