Amorim hoin Lisbon an champion

Liverpool nen sawizawm a nih avanga ngaihven hlawh thar, Sporting Lisbon coach Ruben Amorim chuan Lisbon chu Primeira Liga nomawi a chawipui - kum 39 mi manager-in league nomawi vawi hnih a chawina chiah a ni a, season li chhungin Lisbon khaw club hi Portuguese top flight league-ah vawi hnih a champion pui thei tihna a ni.

Sporting hian Inrinni zan khan Portimonense chu 3-0 in an hneh a, champion an hnaih sawt - Pathianni zanah anmahni hnaih bertu Benfica inlan ve lehin, Famalicao lakah 2-0 in an tlawm a, match hnih chiah khelh tur awm tawhah Sporting Lisbon an um phak thei tawh lo a, Amorim leh a naute an champion.

Sporting tan league nomawi an chawi vawi 20-na chiah a ni a, 2021 hnua an champion lehna hmasa ber a ni bawk. Coach Amorim hi April thla khan Liverpool nen a thuphunga inrem ang hiala sawi hman a ni a, mahse, Portuguese coach hian a pha.

Tun hnaiah West Ham-a David Moyes thlak tur anga sawi a ni a, season boruak san vanglai taka London-a Hammers thuneitute nen an indawr avangin Sporting fan-te hnenah ngaihdam a lo dil tawh hial.

Hetihlai hian Amorim duhtu zingah Chelsea hming pawh lam rik a ni a, khawthlang media ṭhenkhat chuan Blues nena an indawrna a ruk thei ang bera kalpui an duh avangin Hammers nena inbiakna pawh kalpui tel ve chauh angin an tarlang hial - hunin a la hril zel ang.