Leverkusen an tlawm lo zel

Bundesliga champion Bayer Leverkusen chu hneh loh tawng loin an kaltluang zel - Inrinni zan khan Eintracht Frankfurt lakah 5-1 in hnehna an chang a, inelna hrang hrangah a zawnin match 48 chhung chu tlawm loin an awm mek a ni.

Arsenal midfielder hlui Granit Xhaka chuan minute 12-naah goal a khung ṭan a, mualneitu lamin Hugo Ekitike hmangin sut mah se, mikhual team hian Patrick Schick, Exequiel Palacios, Jeremie Frimpong leh Victor Boniface te hmangin an khung belh.

Xabi Alonso enkawl Leverkusen hian Bundesliga match pahnih an la hmabak - Vfl Bochum leh Augsburg te an la hmachhawn ang, an tlawm lo a nih chuan Arsene Wenger enkawl Arsenal ang khan hneh loh nei loa league champion thei an ni ang.

Leverkusen hi Bundesliga champion an ni satliah lo, match khelh hmabak panga awmah an champion thei. German Cup final an lut tawh bawk a, inelna dang Europa League final lut turin an dinhmun a ṭha bawk - khualmualah AS Roma 2-0 in an hneh a, Italian club hi an la mikhual ve leh thung dawn a ni.