Red Bull rorelna titawptu Lando Norris

Formula 1 Miami Grand Prix neih zawh takah Lando Norris a tlan chak ber. McLaren driver hi champion lai Max Verstappen hmaah a thleng a, tun season rorel mektu Red Bull hmaa a thleng thei hi a tan thil chhinchhiah tlak tak a ni ngei ang.

Pathianni zanlai khan Miami International Autodrome-ah inelna neih niin, sprint race lama pakhatna Verstappen chu a hmasa ber aṭangin a tlan ṭan a, world champion vawi thum ni tawh hian tun hnuaiah a zawnin a hmasa ber (pole) vawi sarih a luah ta.

Miami Grand Prix bikah erawh Max-a hi a hmasa ber aṭanga a tlan ṭan vawi khatna a ni ve thung, atan thil awlsam leh nuamsa a ni bik lo. Dutch tlangval hi rinkai ni mah se safety car tlan luh a ngaihna intlansiakah Norris a chungnung ta ber.

British tlangval Norris hian car intlansiakna sang ber hi vawi 110 a hmachhawn tawh a, pathumna chinah (podium) vawi 15 a thleng tawh, chak ni hmel hmu si loa pathumna chin ni thei tam ber record a siam hial - tunah erawh a hun a thleng ve ta.

Norris leh Verstappen te hnungah hian Ferrari driver Charles Leclerc a thleng a, championship lama pahnihna ni lai Sergio Perez chu palina a ni - Red Bull driver pahnihte hi midang chungah an la leng chhunzawm zel rih a ni.

Kum 24 mi Norris chuan, "Intlansiak hautak leh awlsam lo tak mai a ni a, inelna neih chhung pawh a rei duh ngar ngar khawp mai. A tawpah erawh ka hun a thleng ve ta, ka lawmna hi thua sawifiah theih chi a ni lo.

"Engtik niah emaw chuan ka tan hun ṭha hi a lo la thleng ve ang tiin ka suangtuah ṭhin a, tunah chuan ka nghak chhuak ve ta. Tun dinhmun min thlenpuitu ka team chungah lawmthu ka sawi," tiin a hlawhtlinna chu team thawhrah a ni tih a sawi.

Car intlansiakna season kal mekah Verstappen chuan point 136 hmuin hma a la hruai zel a, a zawna a vawi li nan champion a tum mek. A hnungah hian Max-a ang bawka Red Bull car khalhtu Perez (101) awmin, Leclerc (98) leh Carlos Sainz (85) ten an dawt a ni.

World champion vawi sarih ni tawh Lewis Hamilton a la che fuh hleithei lo. Mercedes driver hi paruknaah a thleng a, a vawi riat nana champion a tumna chu a la hlawhtling thei dawn rih lo niin a lang.

Hamilton hian Mercedes tana a season hnuhnung ber a hmang mek a, season tharah chuan Ferrari a zawm dawn. Kum 39 mi a ni tawh a, champion hnem lama Michael Schumacher-a nen record inṭawm an neih lai chu khum tumin a la bei dawn a ni.

May 16, Pathianni zan hian Autodromo Enzo e Dino Ferrari-ah Emilia Romagna Grand Prix an tlan leh ang.