Germany roreltu Bayern Munich

FIFA World Cup champion Germany rama club ṭha zual 18 te inelna Bundesliga-a team ṭha ber chu Bayern Munich an ni.

Inrinni zan khan Bayern Munich hian Robert Lewan-dowski goal hnih khung hmang-in Ingolstadt 2-1 in an hneh a, Bundesliga title ṭum 26 an chawina niin tun hnai kum li chhungin an champion fai vek a, German league-a champion zawn rei thei ber an ni hial!

Bayern an lian

Inkhel dangah Borussia Dort-mund chu Eintracht Frankfurt lakah 1-0 in an tlawm a, Dort-mund hi chak pawh nise Bayern-in point an hmuh avangin an champion chiang tho; Bayern hian point 85 hmuin match khat khelh hmabak la awm aṭangin lehpelh theih an ni tawh lo.

Tun season-ah Bayern hian league match 33 an khelh tawh aṭangin vawi 27 hnehna an chang a, an khingpuite nen ṭum li inhnehtawkin vawi hnih chiah chak loh an nei. Goal 61 an khung laiin goal 16 chiah an chhuah bawk.

Pep Guardiola-a'n season thum chhung Allianz Arena-ah hun a hman chhungin Bundesliga title pathum a la hman a, league match 101 a kaihhruai tawh aṭangin ṭum 81 zet hnehna a chanpui a ni. Mahse, Barcelona manager hlui Guardiola hi a famkim bik lo. Season thum chhungin Bayern Munich hi Champions League final a thlen pui zo lo vek a, kuminah pawh Atletico Madrid hneh loin semifinal-ah an tla.

Bayern hian nomawi dang beisei tur an la nei a, May 21 khian Dortmund nen German Cup final an khel dawn. Season thar aṭanga Manchester City enkawl tawh tur Guardiola-a'n German-a a season tawpah nomawi pahnih nena a hun khar theihna hun ṭha a nei.

Dortmund tan a na

Thomas Tuchel kaihhruaina hnuaiah Dortmund hian point 77 hmuin champion lo mah se kum 1963-a Bundesliga khelh ṭan anih hnua pahnihna ni tawh zinga point hmu hnem ber an ni. Inrinni zana Frankfurt an hneh loh kha kum 2016 chhung biakah chuan league match-a an chak lo awmchhun a ni.

Eng nge an sawi?

Guardiola chuan kum 2013-a Bayern chhuhsantu Jupp Heynckes a hre reng a, "Hun hlimawm bik kan tawng a, kumina nomawi kan chawi hi Jupp a thawhrah pawh kha a la ni zel," tiin a thlak tak manager a theihnghilh lo.

Lawmthu sawi chhunzawm-in Guardiola chuan, "Germany mipui chungah lawmthu ka sawi a, mi hrang hrang hian hlawhtlinna kan chan theih nan tha an thawh nasa hle a ni. Hnuhma leh tawnhriat tam min pek bakah hnuhma ṭha ka hnutchhiah theih nana min pui tute chungah ka lawm. In-thlahdah thei miah loa min siamtu Dortmund pawh hlawhtling chiah lo mah se an tan season chhia a ni lo," tiin a sawi bawk.

Bayern Munich chairman Karl-Heinz Rummenigge chuan, "A zawna Bundesliga title vawi li chawi theih hi a ropui a, coach leh player-te hian fak an phu hle. League champion nih hi thil ropui tak a nih avangin hei hian Champions League-a kan chetsualna rilru na pawh a chhawk zangkhai ngei ang," tiin a sawi.

Germany international Thomas Muller chuan, "Dort-mund hi Bundesliga chanchina team ṭha ber pahnihna an ni rih, anni hian season tluanin kan theihna sang ber hmang chhuak thei turin min nawr reng a ni. A tawpah chuan a ṭha ber kan nih zia a lang chhuak leh ta e," tiin an elpui club a kap zauh.

Ngaihnawm

• Arturo Vidal chuan a zawnin league nomawi ṭum nga a chawi ta. Juventus vawi li a champion pui hnuah Bayern-a a season khatnaah a hlawhtling lehnghal.

• Philipp Lahm chuan Bayern Munich tan Bundesliga bikah match 200 hnehna a chanpui ta.

• Tun season-ah Robert Lewandowski-a'n league bikah goal 29 a khung tawh a, kum 2011-12 a Klaas-Jan Huntelaar goal khung zat nih rual chiahin German ni lo hnam dang Bundesliga-a goal khung tam an ni.

• Ingolstadt khan Bayern goal-ah vawi 16 zet an pet a, tun season-ah anni aia Bayern goal lama pet tam an awm lo.