Murray lakah Nadal a chak lo

Champion lai Andy Murray chuan Madrid Open title humhim turin thapui a thawh chho zel a, Inrinni khan Rafael Nadal hnehin final a lut. Inkhel dangah Novak Djokovic chuan Kei Nishikori a lo hneh ve bawk a, nizan khan final khelh niin he thu ziah lai hian result kan hre hman lo.

Britain fachuam Mur-ray tan ATP ranking-a pahnihna nih chhunzawm turin Madrid Open-a champion leh a ngai a, nomawi a chawi lo a nih chuan Roger Federer lakah a hmun a chan dawn. Mahse, French Open champion vawi kua lo ni tawh Nadal lakah 7-5, 6-4 a hnehna changin beisei a nei zui zel.

April thla khan Monte Carlo semifinal-ah Nadal hian Murray hi a lo hneh tawh a, tun ṭumah erawh Murray hian ace vawi riat a siam bakah Nadal-a break point hmun vawi 13 aṭangin ṭum 11 zet a hum thei, a beidawn duh loh rah a seng chiang hle.

World number 5 Nadal chuan, "Ka hmuh dan chuan set hmasa zawkah kha chuan Andy khan a khel ṭha zawk a, mahse set hnuhnungah erawh hun
ṭha pawh ka hmu hnem zawk a, ka van-duai vang chauh a ni," tiin a chak loh chhan a sawi.

World number 1 Djo--kovic chuan Japan star Nishikori lakah a chung-nun zawk zia lan tir lehin 6-3, 7-6 in hnehna a chang. Serbian thiampuipa hian tun hnai an intawn vawi sarihah hnehna a chang fai vek a ni.