Black Cats an him? Magpies beisei a bo?

Inrinni zan Premier Lea-gue-a Leicester City-in cham-pion nomawi an chawi zanah table mawngphah team-ten season thara Premier League khelh ngei tumin theihtawp an chhuah ve thung a, Sunderland-in an khingpui an hneh laiin Norwich City leh Newcastle United erawh an chak zo lo.

Sunderland-in Chelsea lakah vawi hnih lai si phur mah se Premier League khelh zel an la duh tih khelmual chhungah lantirin Blues hi 3-2 in an lehthal. Norwich City-in tlak duh lo mah se an kalkawngah Champions League khelh tum Manchester United an awm avangin 1-0 in an tlawm a, Newcastle United-in goal khung loin tla chiang tawh Aston Villa chu 0-0 in an inhnehtawkpui thung.

Black Cats beiseina

Stadium of Light-a inkhelah mikhual team-in Diego Costa goal hmangin hmahruai mah se minute 41-naah Wahbi Khazri chuan Sunderland tan goal ropui hmangin a thungrul. Mahse, Chelsea-in chawlhlawk hma injury time-ah Nemanja Matic hmangin goal dang an khung leh a, 2-1 in hma an hruai.

Chawlhlawk laia Black Cats player-te thusawi ngaihthlakin awmzia a nei a, minute 67-naah Fabio Borini chuan an si phurh sutin Jermain Defoe-a'n tun season-a a goal 18-na a khung chhunzawm ve lehnghalin Sunderland tan poin thum hlu tak a hlawh chhuak.

Chelsea captain John Terry chu yellow card vawi hnih pek a nih avangin hnawh chhuah a ni a, Blues legend hi Liverpool leh Leicester City an hmachhawn hunah a inlan theih dawn loh avangin chhuak tur anga sawi English defender tan Sunderland an hmachhawnna inkhel hi Chelsea kawr ha chunga khelmual chhunga a inlan hnuhnung ber a ni thei.

Sunderland manager Sam Allardyce chuan, "Tunah chuan Premier League-a kan him leh him loh chu kan kutah a awm ta," tiin a hlim hle. Black Cats tan Premier League khel zel turin match hnih la awmah match khat chak a tawk.

Mangṭha Norwich?

League match hnih chiah khelh tur nei tawh chunga Nor-wich City-in 17-na Sunderland an phak lohna chu point li lai a ni ta - Inrinni zan khan an mikhual Manchester United chu 1-0 in an hneh lo a, United tan season thara Champions League khelh beiseina chhit nunin a awm zel thung.

He inkhela goal awmchhun lut tur hian Sebastien Bassong tihsual chu Wayne Rooney-a'n nangchingin Juan Mata tan a siamsak a, Spain international hian harsatna nei loin goal-ah a chantir.

Manchester United manager Louis van Gaal chuan, "Hnehna chan ngei kan mamawh thu ka naute ka hrilh a, kan phu ang ngeiin hnehna kan chang a ni. Manchester City leh Arsenal intum tur hian kan team tana a ṭha zawnga nghawng a neih ngei ka beisei," tiin point khata an phak loh City chu chesual tura a duh thu a sawi.

Norwich boss Alex Neil chuan, "Ka player-ten theihtawp an chhuah a, kan tihsual vang liau liauin kan chak lo. Team dang puihnaah kan innghah rualin match hnih kan la nei a ni," tiin a eng zawngin a thlir.

Goal khung lo Magpies

Chak mamawh Newcastle United-in match 11 chhung a zawna chak zo tawh lo Aston Villa lakah hnehna an chang zo lo a, khualmualah season thara Championship khel tur Villa chu 0-0 in an inhnehtawkpui.

First half-a vawi khat chiah goal shot nei Magpies tan second half-a Aleksandar Mitrovic tlan luh hnuah an goal nawrin awmzia nei sawt mah se Serbian striker hian a chance neih
ṭhat vawi hnih lai a khung lo a, Georginio Wijnaldum goal shot chu Magpies keeper Mark Bunn chuan ṭha takin a dan sak bawk.

Kum 1874-a din Villa fan-ten an relegate an tuar thiam thei lo a, minute 74-naah khelmual chhungah ball lem tam tak an vawm lut a, inkhel an ti khaihlak hial.

Nilaini zana Everton hma-chhawn tur Sunderland-in Merseyside club laka hnehna an chang thei a nih chuan transfer bazar-a sum hmang nasa Newcastle United hi season tharah Premier League-ah kan hmuh chhunzawm tawh lo ang.

Newcastle manager Rafa Benitez chuan, "First half-ah kan talbuai a, chance kan insiam lo hrim hrim. Second half-ah chance insiam mah ila chak nan a tawk zo lo a ni," tiin hun ṭha an bawh pelh thu a sawi.