Kum 7 hnuah Middlesbrough an kir

Premier League en ṭhin i nih chuan Middlesbrough hming hi i hre tawh ṭhin ngei ang - kum 2009-a Cham­pionship division lama an tlak thlak hnua a vawi khat nan UEFA Cup final hial lo khel tawh team hi Premier League-ah kan hmu leh dawn ta.

Inrinni zan khan Middles­brough hian an elpui leh an hnuai chiaha awm Brighton & Hove Albion chu 1-1 in an inhnehtawkpui a, league match khelh tur awm tawh loah goal difference-a an san zawk avangin Premier League an khel dawn chiang.

Goal hlu tak chu

Inkhel ṭan aṭanga minute 19-na lekah Middlesbrough-in goal an khung ngal a, Gaston Ramirez freekick
aṭanga ball lokal chu Cristhian Stuani chuan goal-ah chantirin Riverside stadium-a Boro fans pungkhawmte an sapatal nasa hle.

Brighton & Hove Albion tana beiseina siamsak turin Dale Ste­phens chuan an si phurh sut­­na goal khung mah se a goal khung aṭanga minute lina lekah hnawhchhuah lehnghal a ni a, pla­yer kim loa khel Brighton tan Boro laka chak beisei ngam chi a ni lo.

Championship an tlak thlak hnua sum harsatna avanga talbuai Boro tan tunah chuan thlamuang takin a mut theih tawh ang - season thara Premier League an khelh dawn avang hian a tlem berah pound maktaduai 170 an dawng dawn!

Brighton hmabak

Championship division aṭang­in season tin Premier League khel turin team pathum an tling ṭhin a, pakhatna Burnely leh pahnihna Middlesbrough-te chu tling chiang sa an ni.

Pathumna aṭanga parukna hian semifinal an khel dawn a, home leh away-a khelh tur a ni. Semifinal-a chung­nung zawk team pahnih hi final-ah an in hmachhawn leh ang a, a chak zawk zawkin Premier League an khel ang - Brighton tan beisei a la bo lo.

Brighton hian English club hlun Sheffield Wednesday chu semifinal-ah hian an hmachhawn ang a, semifinal lehlamah Pre­mier League-a lo inlan fo tawh Hull City leh Derby County an inhmachhawn ve bawk ang.

Eng nge an sawi?

Middlesbrough head coach Aitor Karanka chuan, "Ka tum ram kan thleng ta. Riverside-a ka rawn kal tirh khan Boro hi Premier League club 'class' an nih thu ka sawi a, ka thusawi dikna chu kan hmu a ni," tiin a hlim hle.

Real Madrid assistant mana­ger hlui chuan an hmachhawp sawi chhunzawmin, "Watford leh Bournemouth-te hi kan tan chuan entawn tur an ni. Premier League kan khelh huna kan tum hmasak ber tur chu anni anga inhamtan hi a ni," tiin Championship lama tlak thlak a tum tawh lo.

Boro hian AEK Athens keeper hlui Dimitrios Konstantopoulos, Blackburn Rovers striker hlui Jordan Rhodes, Portsmouth leh Leicester City striker hlui David Nugent, tawnhriat ngah Real Madrid defender hlui Jonathan Woodgate, Uruguay international Cristhian Stuani, Ghana interna­tional Albert Adomah, Liverpool winger hlui Stewart Downing leh Southampton aṭanga loan-a an hawh Gaston Ramirez-te an kawl a, an player-te hi an chelh vek thei a nih chuan season tharah Premier League-a an inhamtang a nih pawn a mak lo ang.

Brownlee-a tan

Middlesbrough players leh fan-ten club chhungkuaa mi ni si lo, zah leh dah san em em mai an nei a, chu chu BBC radio tana hnathawk Ali Brownlee a ni.

Kum 1982 aṭanga Middles­brough chanchin BBC radio-a puang ṭhin Ali hi nikum Novem­ber khan cancer natnain a tlakbuak a, December thleng khan a hna a thawh chhunzawm.

Mahse, February thla khan 'Voice of Boro' tia hminglem an vuahsak journalist hi a boral a, Middlesbrough F.C. chairman Steve Gibson chuan a ṭhianṭha tak a chan thu a puang hial.

Boro manager Karanka pawhin an ropui niah Ali hi theihnghilh loin, "He hmun ka rawn kal tirh aṭang khan Ali hian min thlawp char char a, a thih ni thlengin he team tan hian a awm
ṭhin a ni," tiin Ali chungchang a sawi chhuak.