Inkhelh laiin Patrick Ekeng a thi

Dinamo Bucharest midfielder Patrick Ekeng chu Zirtawpni khan Romanian league-a a club leh Viitorul an inkhelh ṭumin lung ṭha lo vangin khelmual chhungah a tlu a, dawmdawi-in pan pui a nih aṭanga darkar hnih hnuah kum 26-a upa midfielder hi a thih thu puan a ni.

Romanian Football Fede-ration chuan thuchhuah siam nghalin Romanian Cup final-a Ekeng khelhna Dinamo leh Cluj inhmachhawn hun tur chu kar khata an pawh khawtlai thu an sawi a, tun kar inkhel tur zawng zawng chu tih khawtlai vek a nih thu an puang bawk.

Kum 2003 khan Cameroon international midfielder Marc-Vivien Foe chu Colombia nen Confederation Cup an khelh ṭumin khelmualah tluin a lo thi tawh bawk.

Ekeng hian French Ligue 2 club Le Mans FC, Swiss club FC Lausanne-Sport tan a lo khel tawh a, season hmasaa Cordoba CF-in la Liga an khelh ṭumin an player ṭangkai pawl a ni.

Cameroon tana Ekeng-a khelhpui Stephane Mbia chuan, "Cameroon football chhungkua chuan kan unaupa kan chan a, awih thiam a harsa hle. A chhungte tan thlamuanna kan dil sak a ni," tiin twitter lamah an unaupa an ui thu a puang.

FIFA president Gianni Infan-tino chuan, "Hetiang boruak hrehawmah hi chuan thusawi tur a vang ṭhin. Ekeng-a'n club leh ram tana a khelhpui ṭhinten an uina thu ka chhiar a, footballer ropui tak chu a ni phawt mai," tiin Cameroon international chu a thlah ve bawk.

Hetihlai hian Ekeng-a unaunu Monique Chantal chuan a unaupa chu inkhelh hmaa a chauh thu sawiin, "A ṭhian bul hnaite hnenah inkhel tura a inpeih loh thu leh a chauh thu a sawi a ni. Patrick hi mi rilru ṭha leh tluangtlam tak a ni a, a chhungte min kalsan mai hi tawrhthiam a har a, mumang ang mai a ni," tiin a unaupa an thlah dan chu a lungawithlak loh a ti hle.

Ekeng-a nu Celine Chemi chuan, "Ka fapa chungchang sawi tur hian chakna pawh ka nei lo. Mahse, Pathian ka ring tlat a, a ruahmanna chu engpawh ka pawm a ni," tiin Pathian chu a beiseina neihchhun a nih thu a sawi.

Celine Chemi chuan sawi chhun-zawmin, "Football hi hetiang a nih a, professional footballer-te dinhmun hi hetianga derthawng a nih chuan he infiamna hian ngaihtuah nawn a mamawh a ni," tiin player-te himna ngaihpawimawh a ṭul thu a sawi lang nghal.