Madrid lalnu Simona Halep

Romanian tennis player Simona Halep chuan darkar khat leh minute 20 chhungin 6-2, 6-4 a Dominika Cibulkova hnehin Madrid Open hmei-chhe single champion a ni.

World number 7 Ha-lep hian set pahniah hian Cibulkova service a chhuhsak ve ve a, world number 38 Cibulkova erawh-in Halep sevice chhuhsak theihna hun
ṭha ṭum thum a neih chu a chhawr ṭangkai thei lo vek thung.

Romanian star hian tun hnai an intawn hnuhnung vawi lia ṭum thum a hneh loh lakah hnehna a chan tak avangin French Open atan inpuahchahna a nei
ṭha hle. Roland Garros-ah hian kum 2014 final-ah khan Maria Sharapova lakah a lo chak lo tawh a, kuminah erawh beiseina a nei sang hle ang.

Kumin Madrid Open-ah hian world number 1 Serena Williams chu damlohna vangin a inlan thei lo a, Victoria Azarenka pawh hliam vangin a inhnukdawk. Player langsar dang zingah Agnieszka Radwanska, Garbine Muguruza leh Australian Open champion Angelique Kerber te an tlak hma bawk avangin Halep chiah hi seeded chang zingah quarterfinal thleng thei awm chhun a ni nghe nghe.

Kum 24-a upa Halep chuan, "Final-ah khan he hmuna cheng sa bakah kan ram aṭangin min ṭantu ṭhahnem tak an lo kal tih ka hria a, Romania flag ka hmuh ṭeuh avang ngawt pawh khan ka tan inkhelh a nuam hle. Ka champion avangin ka lawm takzet," tiin a sawi.