Euro 2016-a inlan lo tur Kompany

Belgium captain Vincent Kompany chuan Euro 2016-ah hliam vanga a inlan theih loh tur thu Facebook kaltlangin a puang a, Manchester City defender inlan thei lo tur hi Belgium tan thil hriat nuam a ni lo ang.

Real Madrid nen Champions Lea­gue semifinal-a an inhmachhawn ṭumin minute 10 chiah a khel hman tiha an lak chhuah Kompany hi tun season-ah hliam vangin vawi nga lai a chawl tawh a, City-in match 57 khelh tur an neihah vawi 22 chiah a inlan thei a ni.

Kum 30-a upa defender chuan, "Ka ṭhiante leh team-mate te hi France Euro-ah ṭha takin an khel thei ang tih ka ring tlat a, tunah chuan khelmual chhunga inlan loa fan rinawm tak ka nih phawt a ngai a ni," tiin a inlan theih loh tur thu a sawi.

Kompany chuan rilru zangkhai tak a put thu sawiin, "Mi ṭhenkhat tih dan angin ka hmalam hun hi thim taka thlir ka tum lo a, chutiang mi ka ni lo. Rilru hahdam tak leh hmalam hun thui taka thlir chungin ka awm a ni," tiin a lungphang lo.

Euro 2016 khelh turah Belgium hi Italy, Sweden leh Republic of Ireland-te nen an awm ho a, Kompany awm loh laia an match-ah Eden Hazard chuan Belgium hi a lo kaihhruai tawh ṭhin avangin Euro-ah pawh Chelsea winger hi Belgium captain a nih ngei a rinawm.