Champions League semifinal : Madrid khelmualah champion châk Bayern Munich

Bayern Munich-in season 11 zet Bundesliga nomawi a zawna an chawi hnuah tun season-ah an champion lo a, nomawi dang chawi an neih bawk si loh avangin kut ruaka season mangṭha thei dinhmunah an ding mek.

A career-a champion nomawi la chawi ngai lo Harry Kane pawhin champion awlsamna a nih beiseiin Bayern a pan a, mahse, English striker hian tun season-ah nomawi a la chawi chuang lo mai thei!

Bayern beiseina neih chhun chu Champions League chiah a ni tawh a, Kane-a'n champion a châk tluk zeta champion duh dang chu coach Thomas Tuchel a ni - German coach hian season tawpah Bayern a chhuahsan dawn a, nomawi nena mangṭha a duh dawn.

Mahse, Bayern tan chuti ngawtin a awlsam dawn lo. Champions League semifinal-a an hmachhawn hi champion ngun ber Real Madrid an ni a, first leg-ah 2-2 in an inhnehtawkpui. Second leg chu zanin dar 12:30-ah khelh a ni a, Madrid khelmualah a ni!

Chawl hman lo

Real hian Inrinni zan khan La Liga-ah 3-0 in Cadiz an hneh a, anmahni hnaih bertu Barcelona an tlawm zui avangin league-ah um phak theih an ni tawh lo a, La Liga champion an ni. Mahse, champion an lawm hman lo!

Madrid player-ten Inrinni zanah an champion tih an hria a, mahse, champion an lawm ṭhinna Plaza de Cibeles-a an fan-ten champion an lawm pawh chu an zawm ve hman lo. Pathianni zingah training an zawm lehnghal - Real hian zaninah match pawimawh tak an nei tih an hriat vang a ni.

Los Blancos coach Carlo Ancelotti chuan, "Kan fan-te nena champion lawm ho kan châk takzet. Mahse, Nilaini zanah match pawimawh tak kan la nei tih an hriat avangin anni pawhin min hrethiam hle a ni.

"Tun season-a kan game pawimawh berin min hmuah mek avangin kan lawmnaah pawh insum hram hram a la ngai a ni," a ti a, vawi 14 zet Champions League-a nomawi chawi tawh Real chu a vawi 15 nan champion pui a tum ruh hle.

Beisei phak lo

Santiago Bernabeu-a inkhel tur an ni a, hei hian Real dinhmun a tiṭha. Mahse, Spanish champion hi tun hnaia an match-te thlir ila, vanneihnain an lam a ṭang em ni chu aw, tih tur khawpin an vannei ve fo.

Quarterfinal aṭanga Manchester City an pet chhuakte kha vanneih thil tih loh rual a ni lo a, Allianz Arena-ah lah khel chhe zawk ni chungin point an hlawh leh hram a, vanneihnain an lam a ṭan loh hun a thleng thei.

Ancelotti chuan first leg an khelh zawh khan, "Bayern hi team hlauhawm tak an ni a, an ṭhat dan bera an khelhchhuah laiin keini chu kan ni ve lo. Mahse, Nilaini zan hmaa inpeih turin hun kan la nei," a ti.

Italian coach sawi angin Real an insiamṭha vat a, Bayern an draw hnua an match hmasa berah Cadiz chu 3-0 in an hneh. Tunah chuan Spanish champion ni chungin Real an inlan dawn a, an inringtawk sawt ang.

Bayern lam hi

Bundesliga-ah Bayer Leverkusen an champion tawh a, German football lalṭhutthleng aṭangin Bayern chu hnuh thlakin an awm. Bayern-in thaw dep depin, "Champions League tal aw" an ti a, mahse, an dinhmun a him lo.

Mahni mualah 2-2 in Real an inhnehtawkpui a, Madrid khelmualah an lenluh dawn avangin first leg aiin an tan chuan a harsa lehzual tawh ang. Chu mai a ni lo a, Madrid an hmachhawn hnua league match an khelh chhunah an tlawm!

Bayern hia VfB Stuttgart chu khualmualah lenchilhin, 3-1 in an ngam lo a, chutihrual chuan Tuchel-a'n Real nen an inkhel tur a thlir avangin a neih ṭhat ber a thawhchhuahpui lo tih hriat a ṭha.

German club tana player pawimawh Thomas Muller chuan, "A pawimawh ber chu kan chance neihte goal-a kan chantir a ni a, team pahnih inkar daidantu chu tlemtê chauh a nih dawn avangin goal hmaah kan hriam a ṭul ang," a ti.

A hmuhnawm dawn

Bayern tan winger pahnih Leroy Sane leh Jamal Musiala an ṭangkai leh dawn a, first leg-ah player pahnih hian Real tlarhnung an chhaih mangang takzet - Harry Kane a la awm cheu bawk.

English striker hi first leg-ah a reh viau a, second leg-ah chuan nomawi chawi duhin tal nasat a tum ang. Chutihrual chuan Real-in tlarhnung lamah chanchin lawmawm an nei a, first leg-a hrem vanga inlan thei lo Dani Carvajal a lo kir tawh.

Hei chauh a ni lo - Real tan keeper chhuanvawr Thibaut Courtois a dam tawh a, thla kua vel zet a chawlh hnuah Cadiz a hmachhawn. Belgian keeper a awm chuan Real tlarhnung a nghet leh sawt dawn tih a chiang a, a hmaah Carvajal, Antonio Rüdiger, Nacho Fernández leh Ferland Mendy te ho an awm ang a, Sane, Musiala leh Kane inkawp tan pawh a harsa ang.

Midfield-ah Federico Valverde leh Aurelien Tchouameni te chu tlarhnung pui turin an ding thei dawn a, Eduardo Camavinga chu lut thei dinhmunah a ding bawk. Bayern tan Real midfielder Toni Kroos dan chah a pawimawh dawn a, ball pet thiam bik midfielder hi an dan chuan an tan kawng zau taka hawnin a awm dawn.

Hey Jude

Theihnghilh thiang lo chu Jude Bellingham a ni - English midfielder ṭha bik hian Borussia Dortmund tan a lo khelh tawh avangin Bayern Munich a hrechiang a, first leg-ah reh deuh mah se, second leg-ah chuan a theihna tak tak pholan a tum tawh ang.

Tlarhmaah Vinicius Junior hi hmuhnawm leh tur a ni dawn. Brazilian forward hian tun season inelna hrang hrangah match 35 khela goal 21 khungin, assist vawi 11 a nei a, Bernabeu-ah Sane leh Musiala aia lansarh a duh dawn.

Rodrygo hmingin lam hlawh tawk lo mah se, Real tana a ṭangkaina a nep chuang lo. Tun season-ah match 46 khela goal 17 khungin assist vawi kua a nei tawh a, Bayern-in an ngaihthah a nih chuan an tisual ang.

Anni dangchat tura Bayern tlarhnung inrem dan tur hi hmuh châkawm chu a ni - first leg-a vawi hnih chesual Kim Min-jae chungah Tuchel-a'n rinna a nghat zui ngam ang em, tih chu zawhna a ni a, chanchin lawmawm erawh first leg-a inlan thei lo Matthijs de Ligt a dam tawh.