Saitualah Lza leh Apuia an inkhel dawn

Mizo Professional Footballers Association (MPFA) chuan kum danga an tih ṭhin angin Saitualah charity match an khel dawn a, vawiin chawhnu dar 1:00 hian Saitual District XI nen an inkhel ang.

Keifang Centenary Sports Complex-a inkhel turah hian Indian Super League-a Mumbai City champion puitu Lallianzuala Chhangte, Lalengmawia Ralte (Apuia) leh Hmingthanmawia Ralte (Valpuia) te pawh an inlan thei dawn a, Saitual leh a chhehvel mipui an vannei dawn takzet.

MPFA chuan he inkhelah hian bawm an dawh leh dawn a, heta pawisa hmuh tlingkhawmte hi Saitual district-a mi harsa zawkte ṭanpui nana hman tur a ni.

MPFA secretary Lallianzuala Chhangte chuan, "Kum tina kan lo tih ṭhin angin MPFA chuan Saitual DFA nen charity match kan buatsaih leh dawn a ni a, a bik takin Saitual leh a chhehvela awm te leh Mizorama football ngainatuten he charity match hi lo chhim vek turin kan sawm che u a, kan bawm dawhah ṭhahnemngai taka mi harsate ṭanpui nana sum min thawhsak turin kan ngen bawk che u," a ti.

Charity match-ah hian ISL, I League leh MPL player-te chu MPFA XI tan an inlan dawn a, inkhelh chawlhsan tawh, South Tuipui bialtu MLA Jeje Lalpekhlua chuan MPFA XI hi Bengaluru defender hlui Zohmingliana Ralte nen an enkawl ang.