Palace lakah Man United an zawr

Manchester United-in tan hlim ni kawl a êng thei lo! Erik Ten Hag hnuaiah chet chhiatin chin tawk a nei lo a, Thawhṭanni zan khan Crystal Palace lakah 4-0 ngawtin an tlawm. Selhurst Park-a an mualpho avangin Man United hi Chelsea hnuaiah an awm a, an goal difference pawh 'minus' a ni!

Palace tan Michael Olise tan a mawi a, London-a piang France junior team tan a khel Olise hian goal hnih khungin Jean-Philippe Mateta leh Tyrick Mitchell ten goal khat ve ve an khung.

Mualphona chu

Man United-in season ṭan hmain champion an inbeisei a, Palace lakah an khelh dan erawh erawh relegate pawh ni se a mak lo ang. Real Madrid-a nomawi lian tham tak chawitu Casemiro pawhin United kawr a hak meuh chuan inkhelh dan hmang a theihnghilh ta emaw tih mai tur a ni.

Kum 22 mi Olise chuan mual laiah Casemiro chu awlsam zetin a bum a, Olise hian lalut zelin chiang takin a pet goal. Minute 12-naah Olise goal khung hi Kobbie Mainoo leh Jonny Evans te chuan hnai tak aṭangin an en.

Man United hian siphurh sutah an inngai a, mahse Rasmus Hojlund-a'n keeper a tihbuai avangin pawmsak an ni lo. Minute 40-naah Palace bawkin an khung leh a, Mateta-a'n awlsam taka Evans a bum hnuah chiang zetin a pet goal.

Second half-ah pawh Casemiro hmangin United-in siphurh sut ṭhenah an inngai a, offside vangin pawm a ni chuang lo. Palace goal erawh sawisel bo a ni thung. Minute 58-naah freekick aṭanga ball per chu Mitchell-a'n chang fuhin hnai tak aṭangin awlsam takin a khung.

Olise class a rawn lang leh a, minute 66-naah box chhung aṭangin kawh zetin a pet goal. Palace midfielder hi kum 22 mi chauh a ni a, nipui bazarah club lian te chil tiputu a ni thei ang. Chutihrualin an khingpui hi tlarhnung buai Man United tih hriat erawh a ṭha.

Engtin zel?

Manchester United-in goal li an chhuah a ni ringawt lo a, an khel chhe tel. Palace hian goal zawnah vawi 10 an pet laiin United-in vawi hnih chiah goal zawnah a pet. Club lian Man United tan mualphona a ni a, inhliam vanga buai pawh ni se Palace laka goal li chhuah tur chu an ni lo.

Chutihrualin first team player 10 zet an inhliam avangin United tlarhnung laiah Evans leh Casemiro te an inkawp a ṭul a, goal li chhuah nan, chhuanlam a tling chuang lo. Ten Hag pawhin, "Kan khel ṭha tawk lo a, kan tih tur ang kan ti lo," tiin insawifiah a tum lo.

Palace an hmachhawn hma hian nipui bazarah Man United an inṭhuahfai dawn tih thawm a ring a, Selhurst Park-a an khelh dan thlirin a rinawm lehzual. Dutch manager Ten Hag pawh a dinhmun a derthawn belh a, FA Cup nomawi pawhin a chhan zo ang em tih hi zawhna a ni ta.

Man United-ah chuan Dutch manager ropui Louis Van Gaal meuh pawh FA Cup nomawiin a chhan zo lo. Chutihrualin Ten Hag-a vanneih theihna chu a thlakna tur manager an awm lo hi a ni. Nipui bazarah player inlei thawm chauh ni loin manager indawr thawm a ring dawn. Club lian Liverpool, Bayern Munich leh Barcelona te chu manager thar mamawh vek an ni bawk.