MPL11 Qualifier : SYS FC Vs FC Bethlehem

MPL11 Qualifier round 2 chu vawiin hian RG Stadium-ah khelh chhunzawm a ni dawn. Chawhma dar 11:00-ah FC Bethlehem leh SYS FC, Lunglei te an inkhel dawn a, heta chak zawk hi season thara MPL khel tur ang hialin an ngaih theih. Chawhnu dar 1:30-ah Lawngtlai club MLS FC leh Bethlehem Vengthlang FC te an inkhel leh ang.

FC Bethlehem hi MPL khel tawh an nih bakah ADFA First Division champion an ni a, match hmasa berah an veng ṭhenawm BVT hmachhawnin inkhel thunun mah se point khat chauh an hlawh chhuak. SYS FC erawhin MFA Cup champion MLS FC an hneh a, point thum hmu awmchhun an ni.

Coach Lalmuankima enkawl SYS FC hian an elpui ber tura ngaih FC Bethlehem hi an hneh thei a nih chuan MPL11 khel turin an tlin ngei a rinawm tawh. Chutihrualin Bethlehem hi an chak zawk a nih chuan, coach Lalhriapuia enkawlte hi MPL11 khel tura buk rit ber an ni tawh ang.

Chutihrualin MLS FC leh BVT te inkhela chak zawk pawhin MPL khel turin beiseina sang tak an nei dawn. Inkhel thiam veng tia sawi ṭhin BVT-ah tawnhriat nei ṭha Lalrammawia te an la tel thei a, inpuachahna nei ṭha tawk lo mah se pressure sangah an theihna angin an khel chhuak thei ang.