Vawiinah Mizoramin Chhattisgarh an pan dawn

Swami Vivekananda U20 Men’s National Football Championship khel turin Mizoram team chuan vawiin hian Aizawl an chhuahsan dawn. Inelna hi Ramakrishna Mission Ashrama Sports Complex, Narainpur, Chhattisgarh-ah khelh mek a ni.

Mizoram hian May 12, Pathianni tlai dar 3:30-ah hian match hmasa berah Meghalaya an hmachhawn dawn. An group F-ah hian Meghalaya bakah Rajasthan leh Maharashtra te an awm.

Group khat aṭangin a sang ber chauh quarterfinal an lut dawn. Mizoram hi an group-ah pakhatna an nih theih chuan quarterfinal-ah group G pakhatna an hmachhawn ang. Group G-ah Tripura, Madhya Pradesh, Assam leh Arunachal Pradesh te an awm a, quarterfinal hi May 18, Inrinni zana khelh tur a ni.

Semifinal hi May 20-ah khelh a ni ang a, final hi May 22-ah khelh a ni thung ang. Match zawng zawng hi Indian Football YouTube Channel-ah pek vek a ni.

Mizoram hian nimin khan training hnuhnung ber RG Stadium-ah an nei a, inelna hmachawn turin an inpeih. coach HC Zarzoliana'n a ho a, Zara chuan, "Champion thei tur khawpin kan ṭha," tiin Vanglaini a hrilh.