PSG pet chhuaktu Borussia Dortmund

Rinkai lo zawk an ni a, team pumpui thlir chuan hming langsar lo leh hlawh tlem zawk ni bawk mahse Borussia Dortmund chuan Kylian Mbappe awmna Paris Saint Germain hnehin Champions League final an lut.

Bundesliga team hian PSG chu Paris khawpuiah ngei mai Mats Hummels-a goal khat hmangin 1-0 in an hneh. Signal Iduna Park-a inkhelah Dortmund hi si khat faiin an lo chak tawh bawk, a belhkhawmah 2-0 in an chungnung.

Nizan khan Real Madrid leh Bayern Munich ten semifinal hnuhnung zawk an khel, a chak zawk leh Dortmund ten England rama khelmual hmingthang Wembley Stadium-ah nomawi an la inchuh leh dawn a ni.

A hmuhnawm

Inkhelh hma khan Luis Enrique chuan Parc des Princes boruak a nawm tur thu leh, anmahni ṭantute hmaah chuan an dinhmun a ṭhat a beisei thu a sawi lawk a, mipui 48,583 lenna khelmual chu a khat hneh hle a, thawm bengchheng tak nen mikhual an lo thleng.

PSG tan final lut turin goal khung ngei ngei a ngai a, a tir aṭangin na takin an nawr nghal. Mahse, goal hlauhawm nei hmasa zawk chu Dortmund niin defender Julian Ryerson chuan hnai tak aṭangin goal ban sirah kawh takin a pet chhuak.

PSG-in chance an nei ve nghal. Ousmane Dembele-a'n goal bar chunga hlap chhuakin hlauhawm a siam a, a hnua kan hmuh leh erawh Karim Adeyemi a ni. Dortmund lamin counter attack hmangin an bei let a, khelmual chanve hma lam aṭangin Germany international hian chak takin ball a tlanpui.

Box chhung thlengin a luh pui a, defender tawnhriat ngah Marquinhos-a'n a lo dan hmain a shot a, goalkeeper Gianluigi Donnarumma rawn tawlh hma hret chuan a lo dansak hram - PSG an la him leh rih phawt.

Goal khat a lut

Dortmund tlarhnung an inveng thiam a, mual sira tlan chak Mbappe leh Dembele te an dangchat thei, hetih karah hian Warren Zaire-Emery chuan remchang a hmu, mahse ani hian a goal chinga tura ngaihah goal ban a pet per leh tlat.

German club lam corner hmuhah PSG an fimkhur tawk lo, midfielder Julian Brandt-a pet chu vengtu nei lo Mats Hummels chuan a duhtawk maiin a lo tauh thei a, a hnaiin ball a rang tawh si a, keeper lian tak Donnarumma tan pawh dan theih a ni ta lo.

PSG lamin phurh belh huama an nawr an ngai tawh a, mahse an nawr hleithei lo - an vanduai ve bawk. Box pawn aṭanga Nuno Mendes-a shot chual goal ban a per a, forward ṭha Mbappe-a shot per kang pawhin crossbar a fuh bawk.

An intawn vawi hnihah PSG hian goal khung tuma shot vawi 44 tehmeuh an nei a, kum 2003-04 aṭanga Opta Stats an hman hnuah Champions League (leg pahnih) a goal khung si loa shot tam ber an ni hial, an vanneih ṭum a ni mawlh lo.