Saitualah MPFA XI an chak

Mizoram Professional Footballers Association chuan nimin khan Saitual DFA nen charity match an khel a, 4-3 in an chak - MPFA XI tan Inter Kashi player pawimawh Edmund Lalrindika chuan goal hnih khungin, Mumbai City tana ISL nomawi chawitu Lallianzuala Chhangte leh Lalengmawia Ralte (Apuia) ten goal khat ve ve an khung bawk.

Saitual DFA XI-in an khawtualah mualpho an duh bik lo a, Aizawl FC winger leh season thara Kerala Blasters zawm tur R. Lalthanmawia chuan Saitual DFA tan goal hnih khungin, F. Lalnuntluanga'n goal khat a thawh ve bawk - a tawpah MPFA XI chu 4-3 in an chak.

MPFA-te hian season chawlh apiangin, kum tinin charity match an khel ṭhin a, Keifang Centenary Sports Complex-a charity match-ah pawh hian bawm dawhin, heta ṭanga sum tlingkhawmte hi Saitual district huam chhunga mi harsa zawkte ṭanpui nan an hmang dawn a ni. He thu buatsaih a nih lai hian an sum hmuh tlingkhawm zat hriat theih a la ni lo.

Keifang Centenary Sports Complex khat tlata mipui kal khawm hmaah MPFA hian season hman zawh taka player che ṭhate chawimawina hun an hmang bawk a, player of the season atan Mumbai City forward Lallianzuala Chhangte chu thlan a ni.

Lunglei tlangval hi Fans Player of the Season atan thlan a ni bawk a, online kaltlanga vote thlak niin, fan-ten AIFF Player of the Year ni lai hi Mizo player zinga season hmang ṭha berah

an ngai. Lza hian season hman zawh takah khan Mumbai City chu ISL nomawi a chawipui a, league match 25 khelin goal 10 a khung a, assist vawi ruk a nei - season hmasa khan goal 10 leh assist vawi ruk tho neiin, Indian player zinga season khat aia tam ISL-a goal 10 khung tling thei hmasa ber a ni. MPFA hian an president Jeje Lalpekhlua chu MLA atana thlan tlin a nih avangin lawmpuina thilpek an hlan bawk.

Hetihlai hian Young Player of the Season atan Aizawl FC forward Lalrinzuala chu thlan a ni a, Serchhip striker hian I League-ah match 20 khela goal 15 khungin, assist vawi thum a nei. Rinzuala hi Indian player zinga season khata I League-a goal 15 khung thei hmasa ber a ni a, tun international break-ah India probable squad-a awm turin koh a ni nghal bawk.

Season hman zawh tak kha Mizote tan chuan Indian football-a kum ṭha tih loh rual a ni lo. ISL champion team-ah Lza, Apuia leh Hmingthanmawia Ralte (Valpuia) te an tel a, I League champion Mohammedan SC-a captain chu Zodingliana Tochhawng niin, ani bakah hian David Lalhlansanga, Lalremsanga Fanai, Samuel Lalmuanpuia, Vanlalzuidika leh Lalbiakhlua Jongte te an tel.

Tun hnai khan Igor Stimac chuan June thlaa World Cup qualifier khel tur Indian football team atan probable squad a puang a, Mizo pasarih - East Bengal defender Lalchungnunga, Inter Kashi midfielder Edmund Lalrindika, Odisha forward Isak Vanlalruatfela, Mohammedan striker David, AFC chhuanvawr Rinzuala, Mumbai midfielder Apuia leh forward Lza te a ko tel.