Reus awmna Dortmund

Player ṭha tam tak an chher chhuak tawh a, chumi mite chuan hlawh tam zawk hlawh tur leh club lian zawk tana khel turin Borussia Dortmund an chhuahsan ṭhin, chung karah chuan Marco Reus erawh a chang reng - ani meuh pawh tun season tawpah a chhuak dawn.

Kum 34 mi Reus chuan, "Sawifiah ngaihna awm lo khawp a ni, kum 10 zet a liam hnuah Borussia Dortmund chuan Champions League final kan khel leh dawn ta. Mi beisei leh rinkai kan ni lo tih pawh kan hria, mahse a pawimawh ber hnehna kan chang tlat.

"Nakinah chuan kan lamah vawi engzat nge an shot a, eng ang takin nge min nawr tih hi an chhut dawn tawh lo, a chak zawk erawhin hriatreng an hlawh tawh ṭhin," a ti, a club hmangaih tana a match hnuhung ber chu UCL final a ni dawn, chak a duhna a sang khawp ang.

An chak avanga an hlim thu sawiin Dortmund coach Edin Terzic chuan, "Season hmasa khan Bundesliga match hnuhnung ber thlengin nomawi kan beisei a, mahse kan chawi phak ta lo, tunah chuan min ṭantute lawmna kan siamsak ve leh ta.

"UCL nomawi hi tun hmain kan lo chawi tawh, kan khelmualah ngei a lo lawi luh leh theihna turin a tih theih awm zawng zawng kan ti ang," a ti a, league lama season an hman ṭhat tawk loh chuan Champions League lamah nghawng a nei lo tih a sawi bawk.

Bundesliga table-ah Dortmund hi pangana an ni mek a, season an hmang ṭha lo. Mahse, UCL final an khelh hnuhnung ber pawh khan league champion an phak lohna chu point 25 a ni a, kum 1997 a an champion pawh khan league lama an chet chhiat ṭum a ni.