Leverkusen lakah Roma an tho thei dawn em?

Europa League-ah Liverpool-in quarterfinal an paltlang thei lo a, European football-a club inelna sang ber dawttu hi a 'hot' tur angin a 'hot' tawk thei lo. Mahse, Bayer Leverkusen an la awm a, Xabi Alonso hoa football thawnthu ngaihnawm bik ziaktute avangin ngaihven an hlawh.

Chu mai a ni lo - Leverkusen-in semifinal-a an tawn ber kher hi AS Roma an ni a, Italian club hi player rorum ni ṭhin Daniele De Rossi chuan a enkawl mek a, an vanglaia player langsar pahnihte club enkawl inhmachhawn hi khawvelin hmuhnawm a ti.

Mahse, first leg-ah Roma-in beisei an phak lo a, Leverkusen chu 2-0 in an ngam lo. Zanin dar 12:30-ah second leg khelh tur a ni dawn a, Roma tan thi leh thau pawlha ṭan a ngai tawh. Mahse, Leverkusen khelmual a nih avangin a awlsam lo ang.

Hetihlai hian semifinal second leg inkhel dangah Atalanta chuan Marseille an mikhual dawn a, club pahnihah tlang tur zawk sawi thiam a la harsa - first leg-ah 1-1 in an inhnehtawk a, team pahnihin final luh tumin zaninah an bei ang.

48 = tlawm lo!

Alonso-a nauten season an hmang ṭha a ni satliah lo a, record an siam. Roma an hneh hnuah hian league-ah Eintracht Frankfurt chu 5-1 ngawtin an sawp a, match 48 zet chu a zawnin tlawm loin an kaltluang tawh!

Leverkusen hian European football-a a zawna tlawm lo rei ber record lo awm tawh chu an nih rual a, an nih rual hi Benfica niin, Portuguese club hi December 1963 - February 1965 inkarah khan match 48 zet chu tlawm nei loin an lo kaltluang tawh a ni.

German club-in zaninah record thar siamna hun ṭha an nei dawn a, treble champion an tumna kawngah ke an pen zel. Die Werkself (Leverkusen sawina) hi league-ah an champion fel der tawh a, league match hnih khelh an la hmabak.

An hmabak match hnihah an tlawm lo a nih chuan season tluana tlawm nei loa Bundesliga nomawi chawi hmasa ber an ni dawn a, DFB-Pokal final-in a la hmuak bawk a, Alonso leh a naute hmabakah chona phurawm hlir a inchhawp.

Mahse maw...

Leverkusen-in season tluana tlawm lo a, nomawi pathum chawi theihna hun ṭha an nei a, an hun neih hi khawhral loh hram an duh dawn. Mahse, an hmaa ding tur hi AS Roma an ni a, first leg-ah tlawm mah se, coach rorum De Rossi hoin tlawm nawn an duh dawn lo tih a chiang.

Mahse, Roma tan chanchin lawmawm lo a awm. Kartawp inkhelah Juventus nen inhmachhawnin an chak zo lo a, 1-1 in an inhnehtawk. Result lawmawm lo piah lamah player pawimawh Paulo Dybala chu a inhliam a, he thu buatsaih a nih lai hian zanina a inlan theih dawn leh dawn loh a la chiang lo.

Chuti a nih chuan Romelu Lukaku-a'n mawhphurhna a lak ngam lehzual a ṭul tihna a ni a, kum 30 mi striker hian tun season inelna hrang hrangah match 44 khela goal 20 khungin, assist vawi li a nei tawh.

Tlarhnungah hrem tawk Zeki Çelik a lo kir tawh dawn a, Chris Smalling, Gianluca Mancini leh Leonardo Spinazzola ten tlarhnungah an mawhphurhna an hlen tel a ṭul a, chuti a nih loh chuan mahni mualah pawh an ngam loh Leverkusen hneh hi a harsa ang.

An ṭha

Match 48 zet tlawm tawh lo an nih avangin Leverkusen an ṭha tih loh rual a ni lo a, zaninah mahni muala an khelh dawn bawk si avangin AS Roma lakah chak loh lam an ngaihtuah lo ang - Europa League final an luh lawm an tum dawn!

Florian Wirtz mawlh hi sawi nawn a ngai a, kum 21 mi attacking midfielder hian tun season inelna hrang hrangah match 45 khela goal 18 khungin, assist vawi 19 a nei tawh a, ani hi an dah ṭhat theih chuan Roma tan hna harsa zual a kiam ang.

Chutihrual chuan Lever-kusen hi mimala innghat an ni lo a, Wirtz tih loh player ṭha an kawl nual - Nigerian striker ṭha Victor Boniface hi German club-a a season khatnaah a che pui nghal viau a, match 31-ah goal 19 khungin, assist vawi 10 a nei tawh.

Kum 23 mi forward hian season hmasa lawk kha chuan Belgian Pro League a khel a, tunah chuan European football-a hming langsar pawl a ni der tawh. Striker pasang Patrik Schick-a'n match khel tam tawk lo mah se, a luh chhunah goal a keng tel ṭhin a, full back Jeremie Frimpong hian tun season-ah goal 14 leh assist vawi 12 a nei tawh tih hriat a ṭha bawk.

Atalanta vs Marseille

Marseille khelmuala an intawn hmasakin team pahnih 1-1 in an inhnehtawk a, tlang tur zawk a la chiang lo hle. Team pahnih hi mahni league lama beisei phak lo ve ve an ni a, European football hmangin league lama an mangchhia nghilh an duh.

Atalanta-in Marseille nen an inhnehtawk hnuah league match khelin, Salernitana chu 2-1 in an hneh a, mahse, Marseille erawh match an neih loh avangin an khingpui tur khelh chauh laiin an lo hahdam.

Hei vang hian khualmuala zin tur zawk ni mah se, hah lutuk loin Italy an pan thei dawn tihna a ni a, hei hian thui takin result-ah nghawng a nei thei. A pawimawh ber erawh striker chhuanvawr Pierre-Emerick Aubameyang chet ṭhat a ni.

Arsenal striker hlui hian tun season inelna hrang hrangah match 47 khelin goal 27 a khung tawh a, assist vawi 11 a nei. Chutihrual chuan Atalanta hian tun hnaia form em em mai Gianluca Scamacca an nei a, Liverpool laka goal hnih khungtu striker hian tun season-ah match 38 khelin goal 17 leh assist vawi nga a nei tawh.