Silly Point : A chiang thei lo!

Team 10 inelna Indian Premier League history-ah hian, league round 14 aṭanga round 11 khelh zawh tawh hnua, a tu a te mah tla chiang la awm lo leh playoff lut chiang la awm loh ṭum hi a vawi khat thlenna a ni hial ang. Hei hian team 10 inelte intumtawkzia a tilang chiang mai awm e.

A chian loh dan

Bul ṭan ṭha mah se tun hnai an inkhel hnuhnung pahniha thlensan luhai nei emaw tih tur Rajasthan Royals leh khel ṭha tluang Kolkata Knight Riders-ten point 16 an hmu tawh. Inkhelh hmabak pathum an la neihah, vawi khat an chak chuan playoff ticket an book fel kan ti thei ang.

Chutah point 12 ṭheuh hmu team pali Chennai Super Kings, Lucknow Super Giants, Sunrisers Hyderabad leh Delhi Capitals te dinhmun a la chiang lo hle. Delhi hian match hnih chiah khelh tur an nei tawh a, a bak pathum hian match thum khelh tur an la nei. An kutah engkim a awm. Nizan khan Sunrisers Hyderabad leh Lucknow intum result erawh kan thai lang hman ta lo.

Chiang lo langsar zual

A mawngphah pali Royal Challengers Bengaluru, Mumbai Indians, Gujarat Titans leh Punjab Kings te hi point riat ṭheuh hlawh chhuak tawhin, an hma lam hun hi a la chiang thei mawlh lo.

Mumbai-in match hnih an la nei a, club dang pathum Bengaluru, Gujarat leh Punjab ten match thum vek an nei. Heng team palite erawh inkhel dang result-ah an innghat a; an khelh hmabak an chak vek a, point 12 hmu team palite hi an chak loh zel bawk chuan knockout stage an lut thei ang.

Khawchhe hnuaiah CYMA Cricket

Ṭomir thla kan chuangkai a, ṭhal tawp lam, fur inṭan tur hnuaiah ruahsur nena inmil lem lo CYMA Inter Branch Cricket Tournament chu khelh ve zel a ni. Semi finalist pali a chiang tawh a, Lammualah Zirtawpni hian Durtlang leh Chanmari ten semifinal hmasa zawk an khel ang.

Chumi dawtah finalist dang zawng turin champion lai Ramhlun Venglai leh Luangmual te an inchal tauh veleh bawk dawn a ni. Sihhmui Cricket Ground-a, pitch pangngai leh cricket khelmual tualzawl pangngai chu nise, Ramhlun Venglai leh Durtlang hi finalist tur chiangsa ka ti ngei ang!

Mahse, khelmual zim zawk leh carpet chungah khelhah chuan result danglam thleng thei thung. A zawnin a ṭum lina atan Ramhlun Venglai leh Durtlang ten an final leh dawn nge?

Finalist hmel thar kan hmu dawn. Engmah hi a chiang thei mawlh lo. Infiamna khawvel danglamna leh ropuina erawh : "Engmah chiangsa a awm ngai lo" hi a ni tlat lawi si.

He thu ziaktu pawh hi, IPL leh Inter Branch YMA 2024 champion turte hi ka la chiang thei mawlh lo.