Vawiinah Veteran Football Final

GIG Motors Veteran Football Tournament 2024 final chu vawiin chawhnu dar 1:00 hian Ward No. IX leh Lengpui Veteran ten 1st Bn MAP Ground, Armed Vengah an khel dawn.

Inelna hi G90's buatsaih a ni a, tun ṭum hi vawi thum an buatsaihna a ni. Kum 2022-a inelna an buatsaih hmasak ber ṭum khan Ward No. IX hian final-ah Ward No. IV chu hun pangngaiah goal awm loa an inhnehtawk hnuin penalty shootout-ah 5-4 in an vannei ta zawk.

Inelna vawi hnihna erawh tupawh tel theih (open) a ni a, AMC Ward anga kalpui ni loin Ditea's an champion. Tun ṭum hi inelna vawi thum ni mah se AMC Ward anga kalpui a nih avangin Ward No. IX hi champion lai angin a sawi theih.

Ward No. IX tan inelna hmasa ber an champion ṭuma best midfielder S. Malsawmtluanga a la pawimawh reng a, goal a khung theih bakah game siamtu ber a ni. Mahse, final-ah erawh Reliance Foundation Youth Sports thila a zin a ṭul avangin a inlan thei lo.

Mama awm lo hi Ward No. IX tan channa lian tak a ni dawn a, chutihrualin hranghlui sawi pianga hmiah thiang lo Hrangzuala an la nei tih hriat a ṭha. Hrangzuala hi inelna hmasa berah pawh best player-a thlan a ni a, goalkeeper Zarzoliana hi team chakpui thei player a ni bawk.

Ward No. IX khingpui tur Lengpui Veteran hi Rohmingthanga'n hoin an khel a, 'Pa Roa' tia hriat lar ṭhin player hi tun hma ang thoin danglamna thlentu a la ni reng. Lengpui hian harsa takin final an thleng a, nomawi inchuhna pawh an hriam phah ngei a beiseiawm.