Dan rual lohin Hunthar an kal

Ather Pro Volleyball League 2024 khelh laia mipa inelna huangah Hunthar an kal fawr hle. Thawhlehni zan khan Hunthar hian Hlimen chu 25-17, 25-20, 25-18 in an hneh a, inelna an hmang ṭha chho hle.

Tualchhung volleyball inelna sang leh ngaihhlut berah Hunthar hian match thum an khel a, an chak vek bakah set an la hloh miah lo. An hma a ding apiang starght set hmangin an la hneh fai vek tihna a ni.

LPS Arena, Falkland-a inkhelah Hlimenin theihtawp chhuah mah se team pahnih theihna a inthlau deuh a, Hunthar spiker Anurag Rawat chuan point 11 hlohin ṭum 28 a vaw tla a, a vawi thum nan Kuriz Player of the Match atan an thlang.

Kai thar Hlimen tan PC Lalnuntluanga leh Zolungmuana'n vawi 11 ve ve hlap tlain point thum leh point li an hloh a; a umtu zawkah ṭang tluan. Hunthar tan Anurag chu dan ngaihna a awm lo a, Delhi tlangval service an lak theih loh hnuah 16-10 in Huntharin set khatnaah hma an hruai.

Hlimenin insiamṭhat an harsat a, set hnihnaah Nuntluanga'n point a hmuh hmangin 18-16-in an hnaih hman mah se, Lalnunfela'n a hlap tlak hnuah a hnung aṭangin Anurag chuan a vaw tla zui ve leh a, 22-17-in Huntharin an kalsan a, set khatna ang bawkin derthawng lo in an tlang.

Coach VL Malsawma Renthlei chuan set hmasa ber an lak hnuah setter rinrawl Remsangzuala hahchawlhtirin veteran C. Laldawngkima a luhtir a, set thumnaah player hmun chang tam lote tan hun tha a siamsak bawk a, harsatna an tawh phah lo.

Set thumnaah 18-15-a hniam zawk an nih laiin Hlimenin ṭha takin an bei let a, Nuntluanga'n a vuak tlak hnuah Lalhruaizela hlap an dansak a, Hunthar spiker Fabian Lallunghnema'n vaw sual ve lehin 18-18-in an nih rual chho.

Mahse, team pahnih an inthlau tih a lang zui a, hun pawimawhah Anurag leh Fabian-a'n an invuak tlak chhawk. Hlimen dang chat chungin point sarih an hmu zawn a, harsatna thleng thei lakah an inveng tluan thei a ni.

Fabian-a'n ṭum 11 hlap tlain point hnih a hloh a, C. Lalhriatpuia'n point sarih thawk chhuakin vawi khat a tisual bawk. Hunthar hian May 18, Inrinni zanah Tuichangral an hmachhawn leh dawn a, an chak leh chuan semifinal an lut thei tawh ang.

Pro Volleyball-a an tel hmasak berah Hlimen hi Mizo hlangin an inlan a, vawi hnih an khelh tawhah chak an la nei lo. May 14, Thawhlehni zanah Tuichangral nen an intawng dawn a ni.