Brazil-ah Silva a kir dawn

Chelsea defender Thiago Silva chuan London club a chhuahsan tur thu a tihchian hnuah Fluminense a zawm dawn tih a chiang a, an ram Brazil lamah a kir dawn.

Kum 39 mi Silva hian Fluminense tan 2006-08 kha a lo khel tawh a, a club hlui tana khel leh tur hian kum hnih daih contract a ziak - kum 41 thleng chu Silva hi a khel dawn chiang tihna a ni.

Silva hian kum 2020 khan Paris St-Germain aṭangin Chelsea hi free transfer-in a zawm a, inelna hrang hrangah match 152 khelhsakin, Champions League, FIFA Club World Cup leh UEFA Super Cup-ah te champion nomawi a chawi.

Brazil tan vawi 113 inlana goal sarih khungtu Silva hi Blues legend Frank Lampard-a lakluh niin, Thomas Tuchel, Graham Potter leh Mauricio Pochettino hnuaiah a khel a, tun season inelna hrang hrangah match 35 khelin, goal li a khungsak tawh.

Silva hian Chelsea a chhuahsan tur thu a sawi khan, "Chelsea hi ka tan chuan a hlu em em. He hmunah hian kum khat cham turin ka lo kal a, mahse, kum li ka khel ta zawk a ni," a ti - Chelsea chuan Silva hi July 1-a registration tihfel hmain a team-te zawm an phalsak a ni.

Mauricio Pochettino enkawlna hnuaiah Chelsea-in beisei an phak lo a, league table-ah pasarihna dinhmun luah mekin, season thara Europa League khelh chu an beisei theih san ber a ni mek.