Getafe-in Greenwood an chelh dawn

La Liga club Getafe president Angel Torres chuan, Manchester United aṭanga loan-a an hawh mek forward Mason Greenwood chu season khat dang an hnena cham tura a duh thu a sawi a, United lam hian an rem ti ang em, tih chu zawhna a ni.

Hetihlai hian United chuan Greenwood hi an hnena kir tura tih an tum hran lo a, chutihrual chuan loan bawka chhuahtir ai chuan man man zawka hralh an rilruk.

Torres chuan, "Greenwood emaw, a chhungte emaw, keimahni kutah emaw thutlukna hi awm ta se chuan, Getafe-ah a khelh chhunzawm ang," a ti a, English striker chu chelh an duh thu a sawi.

Kum 22 mi Greenwood hian tun season inelna hrang hrangah Getafe tan match 32 khelin goal 10 a khungsak a, assist vawi ruk a nei bawk. Greenwood hi a bialnu nena an thubuai chungchangah thiam chang mah se, United lamin a hranpaa chhui vein, an hnena khelhtir zel an duh lo.

September 2023 khan transfer tawp niah Getafe hi a zawm a, Spain-ah hian a tlangnel ta viau. Torres chuan, "Kar hmasa khan kan Sporting Director chu England-ah zinin, Manchester United hotute nen pawh an indawr.

"United hian Greenwood hi kir turin an beisei hran lo a, mahse, man man taka hralh theih a nih chuan hralh phawt an duh a ni," a ti a, Greenwood-a'n dawrtu a neih dan chu an ngaihchan phawt a ṭul thu a sawi.

Torres chuan sawi zawmin, "June thla tawp thleng chu kan nghak ang. Club ṭantute leh coach pawh a chungah an lawm a, season khat em kan kawl theih loh pawhin January thleng chu kan hnena a awm kan beisei - footballer ṭha tak a ni," a ti.

Red Devils-a share nei thar Sir Jim Ratcliffe chuan Greenwood-a hma hun chungchangah thutlukna an la siam loh thu February khan a lo sawi tawh.