Greece-ah Villa-in thilmak an thlentir ang em?

Europa Conference League semifinal thawh hnihna chu zanin dar 12:30 hian Karaiskakis Stadium, Piraeus-ah khelh a ni dawn. Aston Villa-in an muala 4-2 ngawt an hneh loh Olympiacos an hmachhawn ang.

European competition-ah away goal rule a awm tawh lo a, Unai Emery hote tan extra time thleng tur pawhin goal hniha chak a ngai tihna a ni. Villa tan final thleng turin Greece-ah thilmak thlentir a ṭul ang.

Thlir let ila

First leg thlir let dawn chuan Ayoub El Kaabi a langsar ta ber. Kum 30 mi El Kaabi hian an ram Morocco bakah China leh Saudi Arabia-ah te chuan hming a chher tawh a, European competition erawh tun season hi a vawi khat khelhna a ni.

El Kaabi hi Turkish club Hatayspor tan season hnih a khel ve tawh a, tun season-ah Al Saad aṭangin Olympiacos zawmin Greece club tan inelna hrang hrangah goal 30 a khung tawh. Mipui hriat a hlawh lehzualna chhan erawh Villa lakah hattrick a siam vang a ni.

Unai Emery-a'n Pau Torres leh Diego Carlos te aiah Ezri Konsa leh Clement Lenglet te a luhtir a, El Kaabi an veng hneh lo. Second leg atan Spanish manager hian ngaihtuahna a sen ṭhat leh a ṭul ang.

Martinez awm lo

Villa-in first leg-ah goalkeeper Emi Martinez awm loh an tuar tih loh theih loh a ni. Goal li luh danah Robin Olsen dem theih a ni lo a, Martinez ngei pawhin a dan a rinawm loh. Mahse Argentine keeper Martinez hi chu hruaitu a ni a, tlarhnung a ho ṭha bik.

Second leg-ah hian Martinez dinhmun a la chiang lo a, mahse Villa hian a ṭul a nih chuan risk lain Argentine keeper hi a luhtir a rinawm. Midfielder Youri Tielemans (tihrawl), left back Alex Moreno (chawn) leh midfielder Nicolo Zaniolo (hnungzâng) te dinhmun chiang lo chuan hmabak a ti harsa lehzual dawn.

Villa hian hliam vangin Boubacar Kamara, Tyrone Mings, Emiliano Buendia leh Jacob Ramsey te an chan tawh a, Olympiacos lakah erawh an harsatna zawng zawng dah ṭhain ṭan phat aṭangin attacking football an khelh a ṭul ang.

Eng nge an sawi?

Olympiacos manager Jose Luis Mendilibar chuan, "First leg-ah kan khelh ṭhin dan angin kan khel chhuak thei a, result duhawm tak kan nei bawk. Kan khingpui ṭhatzia lam kan ngaihtuah lo a, kan theihna angin kan khel mai. Second leg-ah pawh kan chhunzawm leh theih a ṭul a ni," tiin a sawi.

Aston Villa manager Unai Emery chuan, "Thawhchhuah chu kan tum ngei ang. Mahse, tunah chuan Olympiacos zawk hi rinkai zawk chu an ni. Goal li kan chhuah a ni ringawt lo a, ball kan hloh hnem. Semifinal kan khel thei hi chanchin lawmawm a ni a, final khelh theihna hun ṭha hi bawhpelh kan duh lo," tiin a sawi ve bawk.